RU
lombard
BAKIDA CƏKİCLƏ RƏFİQƏSİNİ ÖLDÜRƏN QADINA BƏRAƏT VERİLMƏYİB
13:13
694

BAKIDA CƏKİCLƏ RƏFİQƏSİNİ ÖLDÜRƏN QADINA BƏRAƏT VERİLMƏYİB

Bakı Apellaysiya Məhkəməsində Nailə Apayevanın (1960-cı il təv.) CM-nin 120.2.4 (xüsusi amansızlıqla qəsdən adam öldürmə) maddəsi ilə təqsirləndirilməsinə dair cinayət işi üzrə məhkəmə prosesi yekunlaşıb.

7news.az xəbər verir ki, ötən il iyunun 17-də saat 15:00 radələrində Nəsimi rayonu, A.Mustafayev küçəsi ev 39 mənzil 51 ünvanda Nailə Apayeva yaşadığı evdə rəfiqəsi Lalə Vəliyeva ilə birlikdə nahar etdikdən sonra, sonuncu tənha olduğunu, onu heç kim anlamadığını, bu səbəbdən artıq yaşamaq istəmədiyini bildirib, Nailə və qızının ünvanına nəlayıq ifadələr işlədərək onu söyüb.Bundan hiddətlənən Apayeva aralarında baş vermiş mübahisə zamanı mənzilində olan çəkic və dəhrə ilə Vəliyevanın bədəninin müxtəlif nahiyələrinə çoxsaylı zərbələr vuraraq ona, ümumilikdə 52 ədəd xəsarət yetirib. Lalə Vəliyeva kəskin qan itirmə nəticəsində hadisə yerində keçinib. Daha sonra Nailə meyiti böyük çantaya yerləşdirib və onu hava qaralandan sonra harasa aparıb, tullamaq istəyib. Lakin mənzildə səs-küy eşidən qonşusu Mehman Novruzov 102 xidmətinə zəng vuraraq qonşusu Nailə Apayevanın adam öldürdüyü haqda xəbər verib. Dərhal sonra mərhumun meyiti Nəsimi RPİ 19-cu polis bölməsinin əməkdaşları tərəfindən aşkar edilib və qadın şübhəli şəxs qismində saxlanılıb.

Məhkəmə prosesində Nailə Apayeva ittiham üzrə özünü təqsirli bilməyərək ifadəsində göstərib ki, Lalə Vəliyeva onun rəfiqəsi olub. O, Laləni tanıyanda rəfiqəsi heç yerdə işləmirdi, insanlara faizlə pul verirdi. Lalənin psixoloji durumu yerində deyildi, onun əsəbi və qeyri adekvat olduğu hamıya məlum idi, həmişə evindəki problemlərdən danışırdı. Oğlu Fuad evdən 50.000 dollar oğurlayaraq narkomanlarla xərcləmişdir. Fuad
anasını şantaj edirdi, çünki Vəliyeva əxlaqsız həyat tərzi yaşayırdı, ona görə də əri Nazim Vəliyev onunla boşanıb.
Əri 4 ay əvvəl rəsmi olaraq Səkinə Əliyeva soyadlı qadınla evlənib, bu isə Lalə Vəliyevaya pis təsir edib. Mərhum şahidlərin yanında söyləyib ki, əvvəlki ərinin arvadını öldürəcək. Hadisə günü Lalə Vəliyeva onun evinə nahara gəlib, özünə içki olaraq çaxır gətirib. Yemək zamanı içki içərək dərmanlar qəbul edib və ağlayaraq oğlundan, ərindən, ərinin yeni arvadından, sevgililərindən şikayət edib və, yaşamaq istəmədiyini deyib. Lalə bildirib ki, öncə ərinin arvadı Səkinəni öldürəcək, sonra isə özünə qəsd edəcək. Yeməkdən sonra içkili vəziyyətdə evindəki istilik sistemi olan kombinin yanında yerdə olan alətlərdən baltanı alaraq boğaz nahiyəsinə 2 zərbə vurub. Nailə gördüklərindən şoka düşüb və dərhal ona bint gətirib və qorxa-qorxa bintlə onun boğazını sarmağa çalışıb. Həmin an Lalə balta ilə onun qoluna vurub. Evi qan içində idi. Lalə onu yerə yıxıb və əlinə keçən çəkiclə ona zərbələr vurub, adını Səkinə deyərək onu boğmağa başlayıb. Çarəsiz bir anda çəkici Lalənin əlindən alan Nailə onun başına bir zərbə endirib.

Apayeva göstərib ki, ümumi xəsarətlər mərhumda 4 dənə olub, onlardan üçünü özü-özünə Lalə balta ilə vurub, birini isə o. Bunun nəticəsində
20 dəqiqənin içində mərhum çoxlu qan itirib və ona görə keçinib. Apayeva bildirib ki, Vəliyeva öz evində onun həyatını məhv edib.
İstintaq zamanı müstəntiq ekspertlə əlbir olaraq ekspertizanın rəyində, guya mərhumun üzərində 70 ədəd xəsarət olması yazıblar.
Sonda təqsirləndirilən şəxs məhkəmədən xahiş edib ki, onun barəsində CM-nin 123-cü (zəruri müdafiə həddini və ya cinayət törətmiş şəxsin tutulması üçün zəruri aşmaqla adam öldürmə) maddəsi ilə hökm çıxararaq onu həbsdən azad etsinlər, əks halda o, özünə qəsd edəcək.

Məhkəmədə zərərçəkmiş şəxsin hüquqi varisi qismində dindirilmiş Fuad Vəliyev bildirib ki, ayın 17-də saat 16:30-da anasının telefonundan ona sms gəlib və orda yazılıb ki «mən dostlarımla üç günlük rayona gedirəm, telefonun adaptorunu evdə unutmuşam, telefonun zaryadkası azdır». Sms aldıqdan sonra o, anasına «başın işləyir ?» sözləri ilə cavab yazıb və «bəli» sözləri ilə cavab alıb. Bundan sonra o, anasının telefonuna zəng edib, lakin telefonun bağlı olduğunu görüb. Axşam işdən çıxaraq evə gedib, təxminən bir saat sonra Nəsimi RPİ-nin əməkdaşları ona zəng edərək hadisə barədə məlumat veriblər.

Şahid qismində dindirilmiş Nəsimi RPİ-nin 19-cu polis bölməsinin baş əməliyyat müvəkkili Şahlar Cəfərov ifadəsində göstərib ki, saat
19 radələrində A.Mustafayev küçəsi ev 39 mənzil 48-də yaşayan Mehman Novruzov 102 xidmətinə zəng vuraraq qonşusu Nailə Apayevanın adam öldürdüyünü bildirib. Daxil olmuş məlumatla əlaqədar o və sahə inspektoru Elxan Hüseynov sözügedən ünvana yollanıblar. Mənzilin qapısını döyən zaman qapını Nailə Apayeva özü açıb və onlar, özlərini təqdim edərək mənzilə keçiblər. Onlar Nailə Apayevadan mənzildə nə baş verdiyini soruşduqda, o, mənzildə heç nə baş vermədiyini söyləyib. Apayevanın yaşadığı mənzil çox təmiz olduğundan onun sözləri şübhə doğurmayıb və o, sahə inspektorunu məlumat verən şəxs dalınca göndərib. Onlar gələnədək, mənzilin yataq otağına keçərkən şkafın qarşısında böyük yol çantası görüb və çantanın içinə baxaraq orada qadın meyiti aşkar edib. Bunu görən Nailə Apayeva ağlamağa başlayaraq törətmiş olduğu cinayəti etiraf edib, özünü müdafiə edən zaman Lalə Vəliyevanı öldürdüyünü bildirib və ona pul təklif edərək köməklik etməsini istəyib. Bundan sonra o, polis bölməsi ilə əlaqə saxlayıb hadisə barədə məlumat verib.

Bundan əlavə şahid qismində daha 10 nəfər dindirilib.

Məhkəmənin hökmü ilə Nailə Apayeva 13 il müddətinə azadlıqdan məhrumetmə cəzasına məhkum olunub.


Hökmdən qadın apellyasiya şikayəti verərək barəsində bəraət çıxarılmasını xahiş etsə də, Bakı Apellyasiya Məhkəməsinin qərarı ilə
onun şikayətini təmin etməyib və birinci instansiya məhkəməsinin hökmünü qüvvəsində saxlayıb.

BÖLMƏNİN DİGƏR XƏBƏRLƏRİ