Sosial müdafiəyə xüsusi ehtiyacı olan istedadlı tələbələrin təhsil xərclərinin maliyyələşdirilməsi üzrə müsabiqənin qalibləri ilə görüş keçirilib

Sosial müdafiəyə xüsusi ehtiyacı olan istedadlı tələbələrin təhsil xərclərinin maliyyələşdirilməsi üzrə müsabiqənin qalibləri ilə görüş keçirilib

Azərbaycan Respublikası Prezidenti cənab İlham Əliyevin göstərişi ilə Gənclər Fondu tərəfindən təhsil xərcləri maliyyələşdirilmiş gənclərlə 4 oktyabr tarixində Bakı Konqres Mərkəzində görüş keçirilib.
Görüşdə müsabiqədə qalib olan gənclər, onların valideynləri, dövlət rəsmiləri, Milli Məclisin üzvləri, qeyri-hökumət təşkilatlarının nümayəndələri iştirak ediblər. 
Tədbirdə çıxış edən Azərbaycan Respublikasının Gənclər Fondunun icraçı direktoru Fərid Cəfərov, Azərbaycan Respublikasının Təhsil naziri Ceyhun Bayramov, Milli Məclisin gənclər və idman komitəsinin sədri Ülvi Quliyev qalib gəncləri təbrik edib, yeni tədris ilində onlara uğurlar arzulayıblar. 
Çıxış edənlər vurğuladılar ki, keyfiyyətli təhsilin gənclər üçün əlçatanlığının artırılması və savadlı, dövlətinə, milli-mənəvi dəyərlərə bağlı gəncliyin yetişdirilməsi, gənclərə dövlət qayğısı, eləcə də sosial müdafiəyə ehtiyacı olan gənclərin dəstəklənməsi  Prezident İlham Əliyevin həyata keçirdiyi dövlət gənclər siyasətinin ana sütünunu təşkil edir.
Bu istiqamətdə cənab Prezidentin təşəbbüskarı olduğu insan kapitalının inkişafı konsepsiyasına uyğun olaraq, gənclər üçün son illərdə çoxsaylı imkanlar yaradılmış, sosial həssas kateqoriyalardan olan, I və II qrup əlilliyi olan gənclərin təhsil haqlarının dövlət vəsaiti hesabına ödənilməsi, gənclərin xarici ölkələrin nüfuzlu ali təhsil müəssisələrində təhsilinin dəstəklənməsi və digər addımlar atılmaqdadır.
Müsabiqədə qalib olan gənclər çıxış edərək, gənclərə dövlət qayğısının artırılması ilə bağlı cənab Prezidentin növbəti təşəbbüsü olan hazırkı maliyyələşmə mexanizminin əhəmiyyətindən, xüsusilə də sosial həssas kateqoriyalardan olan gənclər üçün təhsilin əlçatanlığının artırılmasına töhfəsindən danışdılar. Eyni zamanda, təhsilin inkişafı və gənclərə göstərilən hərtərəfli dəstəyə görə cənab Prezidentə təşəkkürlərini bildirdilər.
Daha sonra tədbirdə bəzi qalib gənclərin uğur hekayələrindən bəhs edən videoçarxlar nümayiş etdirilib və müsabiqə qalibləri ilə təhsil xərclərinin qarşılanmasına dair müqavilə imzalanıb. 
Xatırladaq ki, "sosial müdafiəyə xüsusi ehtiyacı olan istedadlı tələbələrin təhsil xərclərinin maliyyələşdirilməsi” üzrə 2018-ci ildə keçirilmiş müsabiqə çərçivəsində 237 tələbənin, bu il keçirilən müsabiqə çərçivəsində isə 425 gəncin təhsil haqqı xərcləri dövlət tərəfindən qarşılanmasına qərar verilmişdir.
 
 
 
 
 
7News.Az

Xəbər lenti