Bakıda küçələrdə tıxac yaranıb: Avtobuslar gecikir

Bakıda küçələrdə tıxac yaranıb: Avtobuslar gecikir
Bu gün Beynəlxalq Avtovağzal istiqamətindən "Koroğlu” metrosu istiqamətinə hərəkət edən 13 nömrəli "Baku Bus” avtobusları 1 saatdan artıq gecikmələrlə hərəkət edib. "BakuBus” avtobuslarının gecikməsi sərnişinlərin də narazılığına səbəb olub.

Məsələ ilə bağlı BNEWS.az-a açıqlama verən Bakı Nəqliyyat Agentliyinin (BNA) mətbuat xidmətinin rəhbəri Mais Ağayev bildirib ki, bu gün 1, 6 və 13 nömrəli "BakuBus” avtobusların gecikməsinə səbəb Heydər Əliyev prospektində nəqliyyatın hərəkətində sıxlığın yaranması ilə bağlıdır: "Ona görə də fevralın 23-də səhər saatlarında avtobuslararası intervalda gecikmələr yaranıb. Hazırda avtobusların sayında heç bir azalma olmayıb. Bir daha qeyd edirəm ki, "BakuBus” avtobuslarının gecikməsinə səbəb tıxacla bağlı olan məsələdir. Hər gün səhər saatlarında Heydər Əliyev prospektində tıxac olur. Nəticədə avtobuslar gecikmələrlə hərəkət edir”, - deyə Mais Ağayev əlavə edib.

Qeyd edək ki, son günlər paytaxt daxilində və ya şəhər kənarlarına hərəkət edən avtobus marşrutlarının işində problemlər özünü daha çox büruzə verməyə başlayıb. Avtobusların qrafikə uyğun olmayaraq həddindən artıq gecikməsi, dayanacaqda gözləmə vaxtının artması sərnişinlərin avtobusa minə bilməməsi, basabas olması və s. kimi hallar pik saatlarında daha da çoxalıb.
 
7News.az

Xəbər lenti