Telekanallarda və radiolarda Azərbaycan dilinin qorunması ilə bağlı ciddi problemlər var. Bir sıra hallarda Azərbaycan dilinin səlisliyi, doğruluğu, düzgünlüyü, tələffüzü və boğaz səsləri ilə bağlı qaydalar pozulur. Bunu qarşısını almaq üçün hansı addımlar atmaq lazımdır?

 

 

Bununla bağlı dilçi-alim, filologiya üzrə fəlsəfə doktoru Cahid İsmayıloğlu BNEWS.az-a açıqlamasında bildirib ki, dilimiz inkişaf etmiş, cilalanmış, zəngin dillərdən biridir: "Müstəqillik illərində bu sahə ilə bağlı xeyli rəsmi sənəd qəbul edilib. Azərbaycan Respublikası Prezidentinin 2013-cü il aprelin 9-da təsdiq etdiyi "Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı” dilimizin saflığının qorunması, ədəbi dil normalarının pozulması hallarının qarşısının alınması sahəsində böyük bir yol xəritəsidir. Sənəddə qeyd olunub ki, televiziya və radio verilişlərində, yazılı və elektron mətbuatda Azərbaycan ədəbi dilinin normalarına əməl olunmasını təmin etmək məqsədilə teleradio şirkətləri və kütləvi informasiya vasitələri sahəsində çalışan mütəxəssislərin  dil hazırlıqlarının yüksəldilməsi təmin edilməli, teleradio şirkətlərində dil və nitq mədəniyyətinin qorunması üçün bədii şuralar yaradılmalı; kütləvi informasiya vasitələri nümayəndələrinin iştirakı ilə seminarlar, dəyirmi masalar, konfranslar, televiziya və radio verilişləri təşkil edilməlidir.

 

Təəssüflər olsun ki, efirə çıxan aparıcıların böyük əksəriyyəti etik normalarla yanaşı dil normalarını da kobud şəkildə pozurlar. Bu aparıcıların davranışında, geyimində, üslubunda nöqsanlarla yanaşı nitqində də ciddi problemlər var. Efir çox qiymətli bir məkandır. Təsəvvür edin bu boyda televiziya qurulub, milyonlar xərclənir, minlərlə insanın əməyi var, milyonlarla insan enerji, vaxt xərcləyib bu efirdə baş verənləri izləyir. Bunun müqabilində baş verənlər bu qədər zəhməti, dəyəri puç edir”, - deyə Cahid İsmayıloğlu qeyd edib.

 

7NEWS.az