Qurban Qurbanov “Qarabağ”ın uğurundan danışdı

Qurban Qurbanov “Qarabağ”ın uğurundan danışdı

"Çox ağır oyun oldu. Bir xalla dönsək də, rəqibin oyununu qeyd etməliyəm. Futbolçularımız bu cür komandaya qarşı sona qədər mübarizə apardılar. İlk dəfədir ki, Çempionlar Liqasının qrupunda çıxış edirik. Futbolçularımızın belə oyunları çox keçirmələrinə ehtiyac var. Şükürlər olsun ki, komandamızın əziyyəti boşa getmədi”.

7news.Az-ın Apasport.az-a istinadən məlumatına görə, bu sözləri "Qarabağ” klubunun baş məşqçisi Qurban Qurbanov "Atletiko” ilə oyundan sonra təşkil edilən mətbaut konfransında deyib. 

- Pedro Enrikenin qırmızı vərəqə aldığı epizodda hakimin qərarından razı qaldızmı?

- Məncə, "qırmızı” düz idi. Hakim haqlı olaraq, həmin vərəqəni göstərdi. Çünki Pedronun ayağı həddindən artıq yuxarı qalxmışdı. Bu mənada, hakimin qərarına etirazım yoxdur. 

- "Qarabağ” qrupun autsayderi kimi göstərilsə də, "Atletiko” kimi rəqibdən 2 xal aldı. Komanda əvvəldən qarşıya qoyduğunuz hədəfə çatdımı, yoxsa yenə hədəfiniz var?

- Çox güclü qrupa düşmüşük. Hər bir rəqibin qrup lideri olmağa potensialı var. Belə oyunları daha çox keçirməyə ehtiyacımız var. Onda futbolçular bərkiyirlər. Onlar bu cür matçlarda məğlub olanda belə, oyundan zövq almalıdılar. Yaxşı nəticə həm futbolçulara, həm də bizə özünəinam hissi verir. Nəticə önəmlidir. Əgər şansımız varsa, futbolçuları maksimum dərəcədə hazırlayacağıq. Dayanmaq istəmirik, potensialımızı daha çox açmaq niyyətindəyik.

- Gələn mövsümdən Çempionlar Liqasında iştirak "Qarabağ” kimi komandalar üçün daha çətin olacaq. Bu barədə nə düşünürsüz?

- Bəlkə də, UEFA-nın qərarı doğrudu. Amma hər bir komanda bu turnirdə iştirak etdikdən, rəqiblərin gücünü gördükdən sonra bu yarışda hər il oynamaq istəyir. Hansı qərarı qəbul etsələr, onu yerinə yetirməyə məcburuq. Qarşıdakı illərdə də Çempionlar Liqasının qrupunda oynamaq üçün, bəlkə də, bir az da möhkəmlənməli, bəzi dəyişikliklər etməliyik.

- Pedronun qırmızı vərəqə alması və Geryenin zədələnməsi oyun planınızı pozdumu? Bir də bu görüşü "Qarabağ”ın qrupdakı ən gərgin matçı adlandırmaq olarmı?

- Belə itkilər olanda planlar istər-istəməz pozulur. Qırmızı vərəqə haqda, ümumiyyətlə, düşünmürsən. Azlıqda oynamaq planlara təsir edir. Amma mən belə oyunlara həmişə başqa tərəfdən baxmışam. Futbolda zədələr, vərəqələr olur. Oyunçular bu cür böyüyüb, inkişaf edirlər. Futbolçularımız daha məsuliyyətli olmalıdılar. Geryenin zədələnməsi gələcək üçün planlarımızı poza bilər. Matça gəldikdə isə Çempionlar Liqasında gərgin keçməyən oyun yoxdur. Düşünürəm ki, getdikcə bizə daha diqqətli yanaşırlar və bu da üzərimizdəki gərginliyi artırır. 

- "Atletiko” ilə hər iki görüşdə yaxşı nəticə qazandığınıza görə hansı hissləri keçirirsiz?

- Futbolda məğlub olmağın və nəticə əldə etməyin öz məsuliyyəti var. Bu hisslər mənə imkan vermir ki, özümüzü rahat hiss edək. Sevinmək bir anlıq olur. Çünki qarşıda bundan da ağır oyunlar var. Belə nəticələr bizə inamla yanaşı, məsuliyyət də verir. Həddindən artıq diqqətli, sadə olmalı və işimizə daha ciddi yanaşmalıyıq. Bu, uğurlu nəticələrin təsadüfi yox, davamlı olması baxımından vacibdir. 

- İlk hissə gözlənilmədən "Qarabağ”ın 1:0 hesablı üstünlüyü ilə başa çatdı. Fasilədə futbolçulara nə dediniz?

- Hər hissənin öz analizi var. Biz oyundan əvvəl hər cür hesaba hazır olmalıyıq. Futbolçulara diqqətli olmağı tapşırırıq. Bir də oyunçulara ayrı-ayrılıqda tapşırıq veririk. Amma bunu burda açıqlamaq istəmirəm. İkinci hissədə qol buraxsaq da, həmin epizoda qədər hər şey qaydasında idi. Futbolçular sona qədər tapşırıqlarımızı yerinə yetirməyə çalışdılar. 

- Bu turnirin yekununda Türkiyə və ya digər ölkələrin klublarından təklif gözləyirsizmi?

- Təklif haqda, ümumiyyətlə, düşünmürəm. Biz elə bir komandadayıq ki, işimizi daim yaxşılaşdırmalıyıq. Bu gün elə bir fikrim yoxdur. Həmişə istəmişəm ki, daim məsuliyyətli olum, çox çalışım və Azərbaycan futboluna kiçik də olsa, fayda verim.

7news.Az

Xəbər lenti