Sökülən “xuruşovka”ların sakinləri mənzilsiz qala bilərmi? - AÇIQLAMA

Sökülən “xuruşovka”ların sakinləri mənzilsiz qala bilərmi? - AÇIQLAMA

"Bakıda köhnə tikililərin, xüsusən də "xuruşovka” adlandırılan binaların sökülərək yerində yenilərinin inşası prosesi başlayıb. İnşaata məsul olacaq şirkətlər mənzil sahiblərinin 2 illik kirayə haqlarını ödəyən və həmin müddətdən sonra inşa ediləcək binada onlara yeni mənzillər təklif edən müqavilə əsasında söküntü işləri həyata keçirirlər".

7news.Az xəbər verir ki, bunu iqtisadçı-ekspert Vüqar Bayramov deyib. O bildirib ki, ilk baxışdan inşaat şirkətlərin təklifi normal təsir bağışlayır: "Bina inşa edilənədək kirayə haqqı ödənilir və daha sonra köhnə binadakı mənzil sahibi yeni və sahəsi müqayisəli şəkildə böyük olan mənzilə sahib olur. Amma proses heç də belə sadə olmaya bilər".

Ekspert deyir ki, inşaat şirkəti öhdəliyini yerinə yetirə bilmədikdə vətəndaşın yeni mənzili necə əldə edəcəyi mexanizmləri bəlli deyil: "Məsələn, təssəvvür edək ki, şirkət sakinlərə kirayə üçün ödəniş etdi, köhnə binanı sökdü və yeni binanı inşa edən zaman o müflis oldu, tikintini başa çatdıra bilmədi. Bu halda, sakinləri yeni mənzillərlə hansı şirkət təmin edəcək? Sakinlərlə inşaat şirkətləri arasında bağlanan müqavilələrdə bu hallar nəzərə alnmır. İnşaat şirkətlərinin aktivləri az olduğundan bu zaman tikintinin başa çatdırılması üçün tələb edilən xərcin aktivlərini sataraq ödəmək də mümkün deyil. Buna görə də gələcəkdə belə hallar baş verən zaman sakinlərin mənzilsiz qalmaması üçün yeni mexanizmlərin hazırlanıb tətbiq edilməsinə ehtiyac var. Tikinti şirkətləri üçün risklərin sığortalanması işə başlamaq üçün əsas tələblərdən biri olmalıdır. Tikinti firması öz risklərini sığorta şirkətində sığortaladıqdan sonra ona inşaat aparmaq icazəsi verilməlidir. Evini tərk edib, kirayə qalan sakin əmin olmalıdır ki, bütün hallarda o yeni mənzillə təmin ediləcək".

 

7news.Az

Xəbər lenti