Lənkəranda piyadanın vurulması ilə nəticələnən yol-nəqliyyat qəzası baş verib.

7news.az APA-ya istinadən xəbər verir ki, hadisə sentyabrın 14-də saat 19.00 radələrində Lənkəran şəhərinin Şəhidlər Xiyabanı ərazisində qeydə alınıb.

Sürücüsünün şəxsiyyəti hələlik məlum olmayan "VAZ-21099" markalı, 42 BL 381 dövlət nömrə nişanlı minik avtomobili yolu keçmək istəyən piyadanı, Lənkəran şəhərinin Sahil küçəsi, 43 ünvanında yaşayan 1962-ci il təvəllüdlü Zahid Zakir oğlu Babayevi vuraraq ona müxtəlif dərəcəli bədən xəsarətləri yetirib.

Yaralı başının təpə nahiyəsinin kəsilmiş-deşilmiş yarası və sağ çiyninin yerindən çıxması diaqnozu ilə Lənkəran Mərkəzi Rayon Xəstəxanasına yerləşdirilib. Həkimlər tərəfindən göstərilmiş müvafiq tibbi tədbirlərdən sonra onun vəziyyətinin stabil olduğu bildirilir.

Faktla bağlı Lənkəran Şəhər-Rayon Polis Şöbəsində araşdırma aparılır.

7news.az