Bu il Musiqili Teatrın aktrisası, xalq artisti Afaq Bəşirqızının 60 yaşı tamam olur.

Mədəniyyət və turizm naziri Əbülfəs Qarayevin müvafiq əmrinə əsasən Musiqili Teatrda A. Bəşirqızının 60 illik yubileyi ilə bağlı tədbir keçirilib.

Tədbirdə Ə. Qarayev başda olmaqla nazirliyin rəsmi şəxsləri və bir çox mötəbər qonaqlar – aktrisanın sənət dostları, ölkənin tanınmış ziyalıları, bir sıra teatrların nümayəndələri iştirak ediblər.

A. Bəşirqızı 60 illik yubileyini səhnədə qeyd edib. Belə ki, yubiley tədbiri çərçivəsində aktrisanın iştirakı ilə Əli Səmədlinin “Toya bir gün qalmış” komediyası nümayiş olunub.

Teatrın foyesində Afaq Bəşirqızının və böyük gülüş ustası, xalq artisti Bəşir Səfəroğlunun həyat və yaradıcılığını özündə əks etdirən foto-sərgi təşkil olunub. Tamaşadan öncə nazir və digər qonaqlar sərgi ilə tanış olublar.

“Sənətimi dəyərləndirən, bu xüsusi gündə məni tək qoymayan, tədbirdə iştirak edən, başda hörmətli nazirimiz Əbülfəs Qarayev olmaqla, hər kəsə minnətdarlığımı bildirirəm. Bundan sonra da teatrımızın, ümumilikdə Azərbaycan mədəniyyətinin inkişafı üçün var gücümlə xidmət edəcəyəm” - deyə, A.Bəşirqızı söyləyib.

Qeyd edək ki, “Toya bir gün qalmış” tamaşasının quruluşçu-rejissoru, Əməkdar incəsənət xadimi Əsgər Əsgərov, quruluşçu-rəssamı Nabat Səmədova, rejissor assistenti Tamilla Aslanovadır. Tamaşada xor və balet truppasının artistləri ilə yanaşı, əsas rolları əməkdar artist Ələkbər Əliyev, aktyorlar Əliməmməd Novruzov, Gülcahan Salamova, Möylə Mirzəliyev, Gültac Əlili, Məhərrəm Qurbanov, Ruslan Mürsəlov, Hüseyn Əlili və başqaları ifa ediblər. Tamaşaçıların maraqla izlədiyi bu komediyada səslənən musiqiləri tanınmış qarmon ustası, xalq artisti Ənvər Sadıqov ifa edir. O, eyni zamanda tamaşanın musiqi rəhbəridir./gun

7news.az