Rusiya Kanberra (Avstraliya) şəhərində səfirlik binası üçün ayrılan torpaq sahəsinə görə məhkəmə işini uduzub.

Bu barədə "SBS News" məlumat yayıb.

Məhkəmənin qərarına əsasən, Avstraliya Rusiya səfirliyinin yerləşdirilməsi planlaşdırılan torpaq sahəsini geri ala bilər, lakin Rusiya ölkə hökumətindən icarə müqaviləsinin ləğvi və məhkəmə xərclərinin yarısı miqdarında kompensasiya alacaq.

2023-cü ildə ölkədə Rusiyanın Kanberra parlamentinin binasından bir neçə yüz metr məsafədə yerləşən diplomatik missiyasının tikintisi üçün ayrılmış ərazidən milli təhlükəsizlik səbəblərinə görə məhrum edilməsi məqsədilə bir sıra qanunlar qəbul edilmişdi. Moskva öz növbəsində 2008-ci ildə 99 il müddətinə bağlanmış icarə müqaviləsinin ləğvini "presedentsiz və son dərəcə arzuolunmaz addım" kimi qiymətləndirmişdi.