Azərbaycan Tələbələr Birliyinin (ATB) Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə həyata keçirdiyi “Təhsil varsa, gələcək var” adlı layihə uğurla davam edir. Bu barədə 7News.az-a təşkilatdan məlumat verilib. 

Layihə çərçivəsində Avropanın müxtəlif ölkələrində ali təhsildə keyfiyyət mexanizmlərini təmin edən proqramların, habelə, Azərbaycanın ali təhsil sistemindəki keyfiyyət təminatı üzrə layihə və proqramların araşdırılması, ölkəmizdəki reallıqlara uyğun keyfiyyət təminatı (quality assurance) proqramının hazırlanması üzrə təkliflər paketinin verilməsi, xarici ölkələrdən olan tərəfdaşlarla təcrübə mübadilələrinin aparılması kimi fəaliyyətlər icra edilməkdədir.
Ali təhsil ilə bağlı daimi araşdırmalar aparan Birliyin əsas məqsədlərindən biri tələbələrin daha keyfiyyətli təhsil ala bilməsi üçün təkliflər verməkdir.

Bu sahədə tələbələrin fikrinin öyrənilməsi, onların qərarvermə prosesinə cəlb edilməsi Birliyin hər zaman prioritetlərindən olmuşdur. Layihə çərçivəsində yeni tədris ilinin başlanmasından sonra tələbələrlə qeyd edilən mövzu ilə bağlı görüşlərin daha da intensivləşəcəyi planlaşdırılır.

Birliyin sədri Elvin Aslanov bildirmişdir ki, qeyd edilən sahələr üzrə xarici təcrübənin öyrənilməsi məqsədilə Birlik üzv olduğu Avropa Tələbələr Birliyinin digər ölkələrdən olan milli tələbələr birlikləri ilə sıx əməkdaşlıq edir. Belə ki, həmin tələbə birliklərinin ali təhsil üzrə işçi qrupları və ekspertləri ilə onlayn görüşlər keçirilir. Layihənin sonunda geniş təkliflər paketinin hazırlanması nəzərdə tutulur.

7News.az