Dünən Avropa Liqasının qrup mərhələsində 2-ci turun oyunları keçirilib.

Qeydə alınan nəticələrdən sonra ölkəmizin UEFA klub reytinqində xal hesabı daha da zənginləşib.

Belə ki, Azərbaycan hazırda 14.375 xalla 26-cı pillədə qərarlaşıb. "Qarabağ"ın qazandırdığı 0.500 xal ölkəmizin irəliləməsinə kömək etməsə də, mövqeyini qorumaq baxımından çox kömək edib. Çünki bu qələbə olmasaydı, 14.125 xalla 27-ci pillədə olan Serbiya ölkəmizi qabaqlayacaqdı.

Klublarımız cari mövsümdə Azərbaycanın xal ehtiyatına 3.875 xal əlavə ediblər. Bu isə yeni rekord deməkdir. Belə ki, təmsilçilərimiz indiyədək ölkəmizə ən yaxşı halda 3.625 reytinq xalı əlavə etmişdilər. Komandalarımızın qarşıda 8 oyunu olduğunu nəzərə alsaq, bu göstəricini daha da yaxşılaşdırmaq olar.

Qeyd edək ki, cari mövsümdə klub reytinqimizə "Qarabağ" 1.500, "Qəbələ" 1.375, "İnter" 0.750, "Neftçi" isə 0.250 xal əlavə edə bilib./milli

7news.az