Azərbaycanlı tanınmış həkim Orucova Elza Qüdrət qızı "İlin həkimi" milli mükafatına layiq görülüb.

Tibb Universitetinin yoluxucu xəstəliklər kafedrasının dosenti, tibb üzrə fəlsəfə doktoru, yoluxucu xəstəliklər üzrə mütəxəssis olan Elza Orucova 1 saylı şəhər klinik xəstəxasında yoluxucu xəstəliklər şöbəsində çalışır.

Haqqında 

Orucova Elza Qüdrət qızı 1955-ci il fevralın 4-də Qərbi Azərbaycanın Zəngəzur mahalının Mığrı bölgəsinin Maralzəmi kəndində ziyalı ailəsində anadan olub. Orta məktəbi əla qiymətlərlə bitirdikdən sonra 1972-1978 –ci illərdə N. Nərimanov adına Azərbaycan Dövlət Tibb İnstitutunda (indiki ATU) təhsil alıb. Ali təhsili başa vurduqdan sonra Sumqayıt şəhərində həkimlik fəaliyyətinə başlayıb.

1989-cu ildə Azərbaycan Tibb Universitetinin yoluxucu xəstəliklər kafedrasının baş laborantı vəzifəsinə qəbul olunmuş, 1990-cı ildə assistent vəzifəsinə seçilib. 1993-cu ildə "Bağırsaq yersiniozunun kompleks müalicəsində maqnitoterapiyanın tətbiqi” mövzusunda namizədlik dissertasiyasını müdafiə etmiş və ona tibb elmləri namizədi alimlik dərəcəsi verilib. 1996-cı ildə dosent elmi adını alıb. 1996-2005 – ci illərdə Azərbaycan Respublikası Səhiyyə Nazirliyi İnfeksionistləri Attestasiya Komissiyasının üzvü olub. 1999-2011- ci illərdə kafedrada tədris hissə müdiri vəzifəsində işləyib. Hazırda "Kəskin respirator virus infeksiyalarının diferensial diaqnozu və və kompleks müalicəsinə müasir yanaşma” mövzusunda doktorluq dissertasiyası üzərində çalışır.

Bundan başaqa 70-ə yaxin elmi və tədris metodik işi, o cümlədən 6 metodik tövsiyə və göstəriş, 1 tədris-metodik vəsait, 3 yoluxucu xəstəliklər fənni üzrə tədris proqramı, 2 yoluxucu xəstəliklər ixttisası üzrə rezidentura tədris proqramı, 1 dərs vəsaiti, 1 dərslik (həm müəlliflərlə) nəşr edilib.

Eyni zamanda Orucova Elza Qüdrət qızı 2003-cü ildə "Vektor” Beynəlxalq Elm Mərkəzinin "XXI əsrin tanınmış həkimi” Beynəlxalq diplomuna layiq görülüb. Azərbaycan Həmkarlar İttifaqı Konfederasiyasının Fəxri Fərmanı (2010) ilə təltif edilib. 1 bədii ədəbiyyatın müəllifidir (Elza Qüdrətqızı "Qüdrət müəllim 30 ildən sonra”, 2011, 660 səh.).

Hal-hazırda kafedranın dosenti vəzifəsində çalışmaqla xəstələrə müalicə və diaqnostik tədbirlərə dair məsləhətlər verir, həmçinin yoluxucu xəstəliklər üzrə mütəxəssis kimi Bakı şəhərinin bir sıra müalicə müəssisələrinə elmi-praktik konsultativ köməklik göstərir.

Üzv olduğu qurumlar 

Hazırda Orucova Elza Qüdrət qızı Avropa klinik mikrobioloqlar və infeksion xəstəliklər cəmiyyətinin (ECCMİD), "SOS Uşaq Kəndləri-Azərbaycan” Assosiasiyası İctimai Birliyi, Azərbaycan Səhiyyə Nazirliyində "Qaraciyərin transplantasiyası” üzrə komissiyanın, eləcə də Azərbaycan infeksionistləri elmi-praktik cəmiyyətin idarə heyətinin üzvüdür. Eyni zamanda Dövlət İmtahan Mərkəzidə rezidentura təhsili üzrə yoluxucu xəstəliklər fənnindən ekspert, ATU üzrə rezidentlərin biliklərinin qiymətləndirilməsi üçün buraxılış yekun attestasiya komissiyasının üzvü, həmçinin ATU-nun yoluxucu xəstəliklər kafedrasında test imtahan sualları üzrə baş ekspert, ATU-nun nəzdində olan FD 03.012 Dissertasiya Şurasının 3205.07 - terapiya və 3221.01 - yoluxucu xəstəliklər ixtisasları üzrə aprobasiya və rəsmi müdafiə şuralarının birdəfəlik üzvü, ATU-nun müalicə işi ixtisası üzrə inteqrasiyalı kurikulum komissiyasının üzvü, ATU-nun II MPF-nin həmkarlar bürosunun üzvü  və ATU-nun II MPF-nin elmi şura üzvüdür.

Qeyd edək ki, Elza Orucova təkcə ölkəmizdə deyil, xaricdə də tanınan həkimlərdəndir. O Avropa klinik mikrobioloqlar və infeksionistlər cəmiyyətinin üzvüdür. Tanınmış həkim bu ilin aprel ayında konqresdə iştirak üçün İspaniyaya yola düşəcək.