Bu gün Bakı Ağır Cinayətlər Məhkəməsində ölkə ərazisində terror-təxribat törədən erməni silahlı dəstələrinin üzvləri - Avakyan Qraç Arzumanoviç, Serobyan Geğam Samveloviç, Baqasyan Armen Yegizari, Qasparyan Qor Vaqramini, Sefilyan Kamo Karenoviç, Hakobyan Volodiya Vaçaqani, Asetryan Gevorq Norairoviç, Yenqoyan Sisak Qrişai, Petrosyan Albert Kamoyeviç, Sedrakyan Romik Misakini, Minasyan Aram Qarnikoviç, Minosyan Mkrtıç Simonoviç, Matesyan Edqar Vaçaqanoviç və Karapetyan Yuri Tiqranoviçin cinayət işi üzrə məhkəmə iclası keçirilir.

"Report”un xəbərinə görə, hakim Əfqan Hacıyevin sədrliyi ilə keçirilən prosesdə təqsirləndirilən G.Asetryan dindirilib.

O bildirib ki, noyabrın 27-də onları Gümrüdə yerləşən hərbi komissarlıqda toplayaraq Azərbaycanın Laçın rayonuna gətiriblər: 

"Səhər tezdən yola düşəndə Rusiya sülhməramlıları bizi yoxlamadan yola saldı. Dağın ətəyində maşından düşüb, oranı piyada qalxmağa başladıq. Dedilər ki, həmin ərazidə olan erməni əsgərləri dəyişəcəyik. Komandirimiz polkovnik-leytenant Arsen Kazaryan idi. Bizi dağın başında bir nöqtədə yerləşdirdi, müşahidə aparırdıq. Orada 10 gündən çox qaldıq. Dekabrın 13-də tapşırıq gəldi ki, dağdan düşək, evə qayıdırıq. Biz də həmin gün dağdan aşağı endik. Bu zaman Azərbaycan Silahlı Qüvvələri tərəfindən saxlandıq. Təslim olub bütün silahlarımızı Azərbaycan əsgərlərinə təhvil verdik”.

Hakim Ə.Hacıyev elan edib ki, G.Asetryanın məhkəmədə verdiyi ifadə ilə istintaqda verdiyi ifadəsi arasında ziddiyyət var. Bu səbəbdən onun istintaqa verdiyi ifadəsi məhkəmədə oxunub.

O, istintaqda dindirilən zaman deyib ki, həmin ərazidə Azərbaycan Ordusunun hərbçiləri gələcəyi təqdirdə, silahlı müqavimət göstərməklə bağlı tapşırıq alıblar. G.Asetryan ifadəsini təsdiqləyib.

Daha sonra təqsirləndirilən şəxs qismində V.Hakobyan dindirilib. Onun sözlərinə görə, noyabrın ayında Gümrüdə yerləşən hərbi komissarlıqdan çağırışçı kimi dəvət alıb:

"Həmin ayın 27-də komissarlıqdan bildirildi ki, gedib ərazidə olan hərbçilərimizin növbəsini təhvil alacağıq, sonra geri qayıdacağıq. Bizə orada silah-sursat verildi və "Ural”la yola düşərək Laçına getdik. Komandirimiz Kazaryan Rusiya sülməramlıları ilə nəsə danışdı. Onlar bizi yoxlamdan yola saldılar. Yenidən yola düşdük, dağın ətəyində maşından düşərək yuxarı qalxdıq. Kazaryan bizi dağın başına çıxartdı və bir neçə gün orada qalmağımızı tapşırdı. Biz də dağda müşahidə aparırdıq. Çadırlar qurduq, ərzaqla təmin edildik. Kazaryanın dediyi vaxt bitdi, lakin bizi dəyişən olmadı. Kazaryan dekabrın 13-də tapşırıq verdi ki, dağdan aşağı düşək, evə qayıdırıq. Dağdan düşəndə yolu səhv saldıq. Bu zaman Azərbaycan Silahlı Qüvvələri tərəfindən saxlanıldıq. 60 nəfərə yaxın idik, təslim olduq”.

Prosesdə təqsirləndirilən M.Minosyan da ifadə verib. O bildirib ki, noyabr ayında Gümrüdə yerləşən hərbi komissarlıqdan çağırışçı kimi orduya çağırılıb:

"Orada silahlandırıldıq və gecə Laçına gəldik. Rusiya sülməramlılarının yanından keçdik. Onlar bizi yoxlamadan buraxdılar. Sonra dağa qalxdıq. Komandirimiz Arsen Kazaryan idi. Bizi dəstələrə böldülər, qida ilə təmin edildik. Dekabrın 13-də tapşırıq gəldi ki, dağdan düşək. Aşağı düşən zaman Azərbaycan Silahlı Qüvvələri bizi saxladı, silah-sursatımızı onlara təhvil verərək təslim olduq”.

O, prokurorun suallarını cavablandırarkən deyib ki, 2016-2018-ci illərdə Azərbaycanın Xocalı rayonu ərazisində hərbi xidmətdə olub: 

"Həmin ərazilərin Azərbaycana aid olduğundan xəbərim var idi. Lakin hərbi qulluqçu olduğum üçün verilən əmrləri sorğulamırdıq. Ümumi komandirim Kazaryan olub, lakin dəstələrə bölünəndən sorna bizə Avakyan Qraç Arzumanoviç rəhbərlik edirdi”.

Daha sonra M.Minosyanın istintaqda verdiyi ifadəsi elan olunub. O bildirib ki, müşahidə apardıqları yerə Azərbaycan Ordusunun əsgərləri gələn zaman onlara silahlı müqavimət göstərmək tapşırığı alıblarmış.

Məhkəmədə Y.Karapetyan, R.Sedrakyan, E.Matesyan da dindirilib. Onlar Gümrüdə yerləşən hərbi komissarlıqdan silah-sursatla Azərbaycan ərazisinə daxil olduqlarını, Azərbaycan Silahlı Qüvvələri tərəfindən saxlanıldıqlarını deyiblər.

Prosesdə fasilə elan olunub.

---

Bu gün Bakı Apellyasiya Məhkəməsinin inzibati binasında erməni terror dəstəsinin üzvü olan Hovanesyan Haykaz Koryunoviç, Manukyan Varazdat Amuşavanoviç, Stepanyan David Stepanoviç, Tosunyan Levan Aşotoviç, Baqdasaryan Artur Eduardoviç, Avakyan Serop Surenoviç, Arutyunyan Varazdat Seryojeviç, Manukyan Jora Vanoeviç, Herabyan Hrayr Hraçoviç, Qosparyan Narek Aqaoviç, Kureqyan Qriqor Qaqiqoviç, Qevorkyan Aşot Artakoviç, Aqramanyan Martin Muşeğoviçin cinayət işi üzrə məhkəmə iclası davam etdirilir.

"Report” xəbər verir ki, Bakı Ağır Cinayətlər Məhkəməsinin hakimi Eldar İsmayılovun sədrliyi ilə keçirilən prosesdə məhkəmə tərkibi və dövlət ittihamçısı elan olunub, təqsirləndirilən şəxslərə hüquqları izah edilib.

Hakim deyib ki, müttəhimlər ifadə verməkdən imtina, məhkəmə və dövlət ittihamçısına etiraz edə bilər.

Təqsirləndirilən şəxslər ibtidai istintaqdan və saxlanma şəraitlərindən narazı olmadıqlarını bildiriblər: "Bizə heç bir təzyiq olunmayıb”.

Müttəhimlərin vəkilləri vəsatətlə çıxış edərək qeyd ediblər ki, Ermənistanın keçmiş müdafiə naziri David Tonoyan və Ermənistan silahlı qüvvələrinin sabiq baş qərargah rəisi Onik Qasparyan barəsində cinayət işi başlanmalı, həmin şəxslər prosesdə ən azı şahid qismində dindirilməlidir.

Təqsirləndirilən şəxslər də vəsarətlə razı olduqlarını söyləyiblər.

Dövlət ittihamçısı deyib ki, vəsatət Cinayət Prosessual Məcəlləsinin 318-ci və 207-ci maddələrinin tələblərinə ziddir: "Məhkəmə təqsirləndirilən şəxslərə qarşı irəli sürülən ittiham əsasında cinayət işlərinə baxır. Əgər məhkəmə baxışı zamanı başqa şəxsin əməlində cinayət işi olarsa, bu məsələ ittihamdan ayrılıb ayrıca icraata verilməlidir”.

Vəsatət təmin edilməyib.

Daha sonra məhkəmə istintaqı başlanıb. Prokuror ittiham aktını elan edib.

Prsosesdə fasilə elan olunub.

----

Bu gün Bakı Ağır Cinayətlər Məhkəməsində ölkə ərazisində terror-təxribat törədən erməni silahlı dəstələrinin üzvləri - Avakyan Qraç Arzumanoviç, Serobyan Geğam Samveloviç, Baqasyan Armen Yegizari, Qasparyan Qor Vaqramini, Sefilyan Kamo Karenoviç, Hakobyan Volodiya Vaçaqani, Asetryan Gevorq Norairoviç, Yenqoyan Sisak Qrişai, Petrosyan Albert Kamoyeviç, Sedrakyan Romik Misakini, Minasyan Aram Qarnikoviç, Minosyan Mkrtıç Simonoviç, Matesyan Edqar Vaçaqanoviç və Karapetyan Yuri Tiqranoviçin cinayət işi üzrə məhkəmə iclası keçiriləcək.

Hakim Əfqan Hacıyevin sədrliyi ilə keçiriləcək prosesdə təqsirləndirilən şəxslərin dindirilməsi davam etdiriləcək.

Xatırladaq ki, 10 noyabr 2020-ci ildə tarixdə Azərbaycan, Rusiya və Ermənistan arasında imzalanmış üçtərəfli bəyanatla atəşkəsin elan olunmasından sonra Azərbaycan Respublikasının ərazisinə qanunsuz olaraq gizli yollarla keçib Xocavənd rayonunun Hadrut qəsəbəsinin şimal-qərb hissəsində meşəlik ərazidə mövqe tutaraq hərbi qulluqçularımıza və mülki şəxslərə qarşı terror-təxribat və digər cinayət əməlləri törədən erməni silahlı dəstələrinin Dövlət Təhlükəsizliyi Xidməti (DTX) tərəfindən 13 dekabr 2020-ci il tarixdə keçirilmiş anti-terror əməliyyatı nəticəsində tərksilah edilmiş üzvləri barəsində DTX-nin İstintaq Baş idarəsində başlanmış cinayət işi üzrə ibtidai istintaq yekunlaşıb.

Aparılan istintaqla müəyyən edilib ki, Ermənistan Respublikasının vətəndaşlarından ibarət bir qrup şəxs qanunsuz şəkildə odlu silah, onun komplekt hissələrini, döyüş sursatı, partlayıcı maddələr və qurğular əldə edərək qanunvericiliklə nəzərdə tutulmayan silahlı birləşmələr yaradıblar. Həmin birləşmələrin üzvləri 26-27 noyabr 2020-ci il tarixdə Azərbaycan Respublikasının dövlət sərhədini qanunsuz olaraq mütəşəkkil dəstə halında keçməklə Xocavənd rayonunun Hadrut qəsəbəsinin şimal-qərb hissəsində meşəlik və digər ərazilərində döyüş mövqeləri tutaraq 13 dekabr 2020-ci il tarixədək olan müddət ərzində ölkə ərazisində yerləşən müəssisə, idarə, təşkilatlara, habelə ayrı-ayrı şəxslərə silahlı basqınlar etmiş, ictimai təhlükəsizliyi pozmaq, əhali arasında vahimə yaratmaq, Azərbaycan Respublikasının dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və başqa ictimai təhlükəli nəticələrin baş verməsi təhlükəsi yaradan partlayış, yanğın və digər terror əməlləri törədiblər.

Sadalanan faktlarla bağlı qanunsuz silahlı birləşmənin üzvləri Avakyan Qraç Arzumanoviç, Serobyan Geğam Samveloviç və digərlərinin, ümumilikdə 14 təqsirləndirilən şəxsin Azərbaycan Respublikası Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə), 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə), 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) və 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunmalarına dair cinayət işinin istintaqı yekunlaşdırılaraq Azərbaycan Respublikası Baş Prokurorunun müavini tərəfindən təsdiq edilmiş ittiham aktı ilə birlikdə baxılması üçün məhkəməyə göndərilib.

7News.Az