ABŞ-ın Ohayo ştatının Kollec Korner kəndində dəhşətli faciə baş verib. 18 yaşlı Elena Markum evdəki zibilləri yandırmaq istəyərkən özü yanaraq iki ay komada qalıb.

Bu barədə "The Sun" yazır.

Belə ki, ötən ilin fevral ayında Elena və valideynləri Miladdan sonra yığılıb qalan köhnə qutulardan qurtulmaq qərarına gəliblər.

Adətən onlar qutuları tonqalda yandırırlar. Bu dəfə də qız sevgilisi ilə birlikdə zibilləri həyətə çıxararaq tonqal qurub.

Kartonları tonqala atanda ocaq sonməyə başlayıb. Elena kənarda gördüyü kanistrın dibindəki benzini düşünmədən közün üstünə töküb. Elə bu an baş verən partlayış qızı kənara tullayıb.

Elena od tutub yanmağa başlayıb. Qışqırıq səslərinə gələn 35 yaşlı atası Robert alov içində yanaraq qaçan qızını yerə atıb, otların üstündə yuvarlayaraq söndürməyə çalışıb. Daha sonra bıçaqla onun bədənindəki paltarları çıraraq əynindən çıxartmaq istəyib, lakin parça artıq dəriyə yapışıb.

Hadisənin şahidi olan qonşu Robertə mələfə atıb. Ata qızını ona bürüyərək odu söndürsə də, Elena təcili tibbi yardım gələnədək huşunu itirib. Qız helikopterlə Indiana ştatının Indianapolis şəhərindəki xəstəxanaya çatdırılıb.

Yanğın nəticəsində Markum bədəninin 86 faizini əhatə edən üçüncü dərəcəli yanıq xəsarətləri alıb. Robertin də əlləri ciddi şəkildə yanıb.

Elena 15 fərqli əməliyyat keçirib, dəfələrlə ona dəri transplantasiyası edilib.

Pandemiyanın qızğın vaxtında komdan ayılan qız uzun müddət valideynlərini görə bilməyib, ilk görüşdə isə atasına onu xilas etdiyi üçün təşəkkür edib.

2020-ci ilin iyul ayında Markum xəstəxanadan evə buraxılıb və hazırda ailəsinin yanında müalicəsini davam etdirir.

Qonşular onun müalicəsi üçün yardım fondu təşkil ediblər.

Elena yanğın mərkəzində sosial işçi və ya tibb bacısı olmağı planlaşdırır. Bu yolla qız onunla eyni problemləri yaşayan insanlara kömək etməyi düşünür.