Ağ Ev lideri Donald Tramp ABŞ-yə idxal olunan bir sıra əczaçılıq məhsullarına 100% həcmində gömrük rüsumlarının tətbiq edilməsi barədə göstəriş verib. Bu qərar istehsalçı şirkətlər qiymətləri aşağı salmaqdan və ya öz istehsalatlarını ABŞ ərazisinə köçürməkdən imtina etdikləri təqdirdə qüvvəyə minəcək. Bu barədə TASS məlumat yayıb. Bildirilib ki, aprelin 2-də Ağ Ev tərəfindən yayımlanan sənədlərə əsasən, prezident ABŞ-nin səhiyyə sistemini və milli təhlükəsizliyini gücləndirmək məqsədilə patentləşdirilmiş əczaçılıq məhsullarına və onların tərkib hissələrinə rüsumların tətbiq olunmasını əmr edib. 100 faizlik tariflər iri müəssisələr üçün 120 gün, kiçik şirkətlər üçün isə 180 gün sonra tətbiq edilməyə başlanacaq. Avropa İttifaqı dövlətləri, Yaponiya, Cənubi Koreya, İsveçrə və Lixtenşteyndən gətirilən məhsullar üçün rüsum dərəcəsi 15% müəyyən edilib. Böyük Britaniyadan tədarüklər üçün bu göstərici daha az olacaq, lakin dəqiq rəqəm hələlik açıqlanmayıb. Vaşinqton ilə məhsulların ucuzlaşdırılması və istehsal güclərinin ABŞ ərazisinə keçirilməsi barədə razılığa gələn şirkətlər üçün istisnalar nəzərdə tutulur. Belə olan halda yeni rüsumlar 20% təşkil edəcək və ya tamamilə ləğv olunacaq. Bundan əvvəl ABŞ rəsmiləri bəzi iri istehsalçılarla bu cür razılaşmaların əldə olunduğunu bildirmişdilər. Sənədlərdə ABŞ Ticarət Nazirliyinin dərman tədarükü ilə bağlı araşdırma apardığı da qeyd olunur. Ağ Evdən vurğulanıb ki, təhqiqat patentləşdirilmiş əczaçılıq preparatlarının və onların inqrediyentlərinin ABŞ-yə idxal həcminin və şərtlərinin ölkənin milli təhlükəsizliyinə təhdid yaratdığını aşkar edib.