Moderator.az-ın  erməni mediasına istinadla verdiyi xəbərdə belə deyilir.  

"ArtsaxTV”-nin yayımladığı reportajda yeni yaşayış məntəqəsinin işğalçı erməni ordusu veteranının təşəbbüsü ilə salındığı vurğulanır. Qarabağın işğal edilməsinin iştirakçısı, "azatarmatik”(erməni fədaisi) Ayk Avakyan  sözügedən ərazidə artıq bir neçə ildir ki, yaşayır.  O deyir ki, aprel döyüşləri zamanı da "Artsax”ın müdafiəçilərinə qoşularaq Azərbaycana qarşı döyüşüb.  İşğalçı veteranın təsərrüfatında  26 qaramal var. Xankəndidəki separatçı-terrorçu rejim A.Avakyana mütəmadi dəstək verir. Bu yaxınlarda rejim rəhbəri Bako Saakyan erməni veterana traktor bağışlayıb. O, indiyədək həyətyanı sahəsində 500  meyvə ağacı əkib. Su təchizatı və rabitə məsələləri öz həllini tapıb. Elektrik kəsintisi zamanı isə  veteranın oğlunun quraşdırdığı günəş batareyalarından istifadə edilir. Hazırda A.Avakyanın evinin yanında daha iki ev tikilir.

Qeyd edək ki,  Araz sahilində olan  "Araksavan” kəndinin əsl adının nə olduğunu  dəqiqləşdirə bilmədik. Ermənistan ərazisində də eyni adlı kənd  var. Bu isə 1978-ci ildən "Araksavan” adlandırılmış  və  Azərbaycan türklərinə məxsus olmuş Qəmərli kəndidir.

Xatırladaq ki,  dekabrın sonunda  erməni KİV-də Amerikanın Erməni Təşkilatı (ASAA) "Tufenkyan” fondunun yardımı ilə Cəbrayılda Araz yaxınlığında Aracamuq  adlı yeni kəndin salınması barədə xəbərlər yayılmışdı.