Ermənistanın  "Armenian Report" agentliyi Qarabağda Ermənistanın düşdüyü açınacaqlı vəziyyəti şərh edərək İərəvanın  müttəfiqlərini ittiham edib. Həmin yazını təqdim edirik.

 

"Aprelin 1-dən ağırlaşan, ağır döyüşlər gedən cəbhə xəttindəki situasiya gərgin olaraq qalmaqdadır.

Diqqətçəkəndir ki, iki ölkə - Türkiyə və Pakistan dərhal Azərbaycana öz yardımlarını təklif ediblər. Məsələn, Pakistan Müdafiə Nazirliyindən Azərbaycan hökumətinə yardım təklifi daxil olub. Bu ölkənin hərbi müəssisəsi hərbi texnika, döyüş sursatı və mərmi təminatı ilə bağlı yardım təklifini edib. Bu təklif açıq mətnlə edilib.

 

Türkiyə Xarici İşlər Nazirliyi isə  Ermənistan ordusunun Qarabağda təxribatını  pisləyib və dünya ictimaiyyətini  Ermənistan ekspansionizminin genişləndirilməsinin dayandırılmasına və ilhaq edilmiş Azərbaycan torpaqlarının azad edilməsi üçün səyləri gücləndirməyə  çağırıb.

Türkiyə Prezidenti Ərdoğan və baş nazir Davutoğlu rəsmi şəkildə Azərbaycan ordusu və Əliyev hakimiyyətinə dəstəklərini ifadə ediblər.

 

Halbuki bizim Kollektiv Təhlükəsizlik Müqaviləsi Təşkilatı (KTMT) müttəfiqlərimiz tərəfindən Ermənistana analoji dəstək göstərilməsi barəsində adi bir işarə də yoxdur. Guya ki, belə bir müttəfiqlərimiz var - bunlar Kollektiv Təhlükəsizlik Müqaviləsi Təşkilatının üzvləri olan Rusiya, Qazaxıstan, Belarus, Tacikistan və Qırğızıstandır.

 

Amma Belarus prezidenti Lukaşenko dərhal Əliyevə zəng edərək özünün dərin narahatlığını ifadə edib və bundan sonrakı təxribatların qarşısının alınması üçün bütün səylərin göstərilməsini vacib sayıb. Belarus Xarici İşlər Nazirliyi birmənalı şəkildə Azərbaycanı dəstəkləyib.

 

Nazirlik özlərinin rəsmi saytında Minskin  münaqişənin beynəlxalq hüququn hamı tərəfindən qəbul olunmuş prinsip və normaları, hər şeydən öncə, suverenitetin , ərazi bütövlüyünün və sərhədlərin toxunulmazlığının təmin edilməsi və BMT-nin müvafiq qətnamələri, ATƏT-in qərarlarına uyğun həllini tapmasına tərəfdar olduğunu  yazıb.

 

Belarusun Ermənistandakı səfiri İqor Nazarov Ermənistan Xarici İşlər Nazirliyinə çağırılıb və orada nazir müavini Şavarş Köçəryan səfirə Belarus Xarici İşlər Nazirliyinin bəyanatı ilə bağlı dərin narazılığını ifadə edib. İqor Nazarova bildirilib ki, bu cür bəyanatlar Ermənistan-Belarus münasibətlərinin ruhuna uyğun deyil və Kollektiv Təhlükəsizlik Müqaviləsi Təşkilatında təmsilçiliklə ziddiyyət təşkil edir.

 

Biz digər müttəfiqlərdən - qazaxlardan da dəstək görmədik. Sosial şəbəkələrin bütün qazax seqmenti qardaş-türk  azərbaycanlılara dəstək şərhləri ilə doludur. Bundan başqa bir sıra daha dəliqanlı qazax, hətta, özlərinin soydaşlarını Azərbaycan səfirliyinə yollanmağa və Bakının cəmiyyətdəki əhvali-ruhiyyəni yaxşı bilən Nazarbayev də öz müttəfiqi Ermənistanı təşkilat çərçivəsində dəstəkləməkdən çəkinib.

 

Qırğızlar və taciklərsə, ümumiyyətlə, susmağı üstün tutublar. Amma bizim bir dəqiqə də olsa, şübhəmiz olmayıb ki, bu iki müsəlman respublikasının simpatiyası Azərbaycan tərəfində olsun.

 

Bircə Rusiya qalıb. Gəlin xatırlayaq ki, 2008-ci ilin avqustunda Gürcüstan Cənubi Osetiya və Abxaziyaya hücum edəndə, Rusiya necə davrandı. Moskva dərhal ordu ilə Gürcüstana ciddi zərbə endirdi və onu sülhə məcbur etdi. İndiki halda isə Rusiya öyüd-nəsihətlərlə və hərbi əməliyyatları dayandırmaq çağırışları ilə çıxış edir. Halbuki biz ermənilər ondan daha aktiv iş gözləyirdik.

Bizim buna tam haqqımız çatır. Ermənistan sözügedən təşkilatın üzvü olmaqdan əlavə, Rusiyanın Qafqazda yeganə müttəfiqidir. Amma ağır vəziyyətə düşən Ermənistan öz müttəfiqləri tərəfindən aşağılanır və ayaq altına atılır" deyə agentliyin yazısında qeyd olunur. /avropa.info