Akademik Milli Dram Teatrı xalq artisti Fuad Poladovun teatrdan istefa verməsi haqqında yayılan məlumatlara aydınlıq gətirib. Teatrın mətbuat xidmətindən verilən məlumata görə, F. Poladov hazırda teatrda fəaliyyətini davam etdirir. F. Poladov da Akademik Milli Dram Teatrından istefa verməsi haqqında yayılan xəbərlərə aydınlıq gətirib. O, APA-ya açıqlamasında bildirib ki, teatrdakı işindən uzaqlaşıb: "Bəli, yayılan xəbərləri təsdiqləyirəm, teatrdakı işimdən getmişəm. Rəsmi müraciət etməmişəm, ərizə yoxdur. Sabah son tamaşamdır, "Müsyo İbrahim və Quran çiçəyi" tamaşasında oynayacağam. Məsələnin təfərrüatı haqqında açıqlama vermək istəmirəm".
Məsələ ilə bağlı 7news.az saytına Jurnalist, Fuad Poladovun tələbəsi Səbuhi Rəhimli münasibət bildirib. Akademik Milli Dram Teatrının Azərbaycanın teatr və aktyor sənətində böyük bir məktəb olduğunu deyən S.Rəhimli ora rəhbərlik etməyin böyük məsuliyyət tələb etdiyini dedi: "Təəssüf ki, Həsən Turabovdan sonra teatra rəhbərlik edən şəxslər ya teatrdan uzaq adamlar olub, ya da teatra pul kisəsi kimi baxanlar. İlin əvvəlində teatr kollektivinin təkidli etirazı ilə istefaya göndərilən İsrafil İsrafilovu rejissor Azərpaşa Nemətov əvəz etdi. Bu dəyişiklik aktyor heyətini sevindirdi ki, nəhayət sənətə dəyər verən biri gəlib. Təəssüf ki, gəldiyi bu müddətdə qeyri-adi heç bir irəliləyiş baş verməyib, əksinə bəzi istedadlı aktyorları işdən çıxarıb, parlamaqda olan bir çox aktyora isə rol bölgüsündə "görünməyən” obrazlar həvalə edir. Bu da haqlı narazılıqlara səbəb olur. Azərpaşa Nemətovun 70 yaşı var və bu adam həm Teatr Xadimləri İttifaqının sədridir, həm teatrın baş rejissorudur, həm direktordur, həm multikulturalizm mərkəzinbə məsul vəzifə daşıyır, həm Mədəniyyət və İncəsənət Universitetində kafedra müdiridir, həm bir çox cəmiyyət və qurumların rəhbərliyindədir. Məntiqlə düşünsək, 70 yaşlı bir insan bütün bu işlərin öhdəsindən layiqincə demirəm, ümumiyyətlə gələ bilərmi? Neçə-neçə insanın iş yerini əhəmiyyətsiz yerə tutub və maaşını alır. Teatr Xadimləri İttifaqında hansı əhəmiyyətli tədbir keçirib, yaxud da hansı gənc rejissoru hazırlayıb? Dillərə düşən hansısa bir tamaşaya quruluş verdiyini də duymamışam. Amma gənc aktyorların parlamasına, istedadlı rejissorların ortaya çıxmasına mane olmağı yaxşı bacarır. Hələ fevraldan gənc və istedadlı aktyor Sərdar Rüstəm bəyanatla istefa verdi. Bu gün də artıq ikinci bir aktyoru da mənasız səbəblərdən işdən qovub. Xalq artisti Fuad Poladov da bununla teatrın uçuruma getdiyini görüb ədalət tələb edib. Lakin sözünün eşidilmədiyini görəndə istefa verib. Akademik Milli Dram Teatrında hazırda çox gərginlikdir. Tanınmış sənətkarlar da Azərpaşa Nemətovun bu addımını qınayırlar. Hətta onların bir çoxu mediada teatrın direktoru və baş rejissoru olan bu adama qarşı etiraz səslərini ucaldırlar. Ən adi bir aktyorun teatrdan qovulması çox böyük qəbahətdir. İndi təsəvvür edin ki, az qala bütün tamaşalarda baş rolu oynayan Fuad Poladovun istefası nə deməkdir? Əminəm ki, sənət adamlarının haqq səsi ucalacaq və tezliklə ədalət öz yerini tutacaq...”

7News.Az