Gənclər üçün Təhsil Mərkəzi Şirvan Regional ofisi "Azərbaycanda uşaqlar üçün ədliyyə mexanizmlərindən istifadənin dəstəklənməsi” layihəsi çərçivəsində bu gün Şirvan şəhərində "Hüquqi yardım və hüquqi təmsilçilik xidmətlərinin göstərilməsi” mövzusunda konfrans keçiribdir.
Unicef-in Azərbaycandakı ofisi, Gənclər üçün Təhsil Mərkəzinin (GTM), Avropa İttifaqının, Azərbaycan hökumətinin birgə reallaşdırdığı layihənin əsas məqsədi regionlarda yuvenal ədliyyə sistemini inkişaf etdirməkdir.
Tədbiri giriş sözü ilə açan Mərkəzin Regional ofis rəhbəri Yusif Poladov iştirakçıları təşkilatın ölkədə uşaq və yeniyetmələrin hüquqlarının müdafiəsini gücləndirmək, qanunla konfliktdə olan və ya risk altında olan uşaqlara çıxışını təmin etmək, regional QHT-lərin bacarıqlarının artırılması istiqamətində gördüyüişlər barədə məlumatlandırıb.
Proqrama əsasən iştirakçılara regionlarda uşaq hüquqları sahəsində fəaliyyət göstərən vəkillər və sosial işçilər üçün uşaqların cinayət, inzibati, mülki və ailə hüququ sahələrində ədliyyə sisteminə çıxışı, aidiyyəti dövlət orqanları tərəfindən uşaqların hüquq və mənafelərinin qorunması istiqamətində beynəlxalq təcrübə və digər mövzularda çıxışlar dinlənilib.
Tədbirdə Şirvan şəhər İcra Hakimiyyətinin rəsmisi Rəfael Nəsirov, yetkinlik yaşına çatmayanların işləri üzrə komissiyanın üzvləri, Polis, Səhiyyə, Təhsil, Məşğulluq şöbəsinin əməkdaşları iştirak edib.