Akademik Z.Əliyeva adına Naxçıvan şəhər poliklinikasında Hemofilyalı xəstələr üçün maarifləndirici tədbir keçirildi.

Dekabrın 24-də Naxçıvan Muxtar Respublikası Səhiyyə Nazirliyinin təşkilatı dəstəyi ilə Hemofiliyalı Xəstələrin Respublika Assosiasiyası tərəfindən Hemofilyalı xəstələr üçün maarifləndirici tədbir keçirilib. Hemofiliya - bütün dünyada, o cümlədən Azərbaycanda geniş yayılmış irsi qan xəstəliyidir. Azərbaycanda rəsmi statistikaya əsasən hemofiliyalı xəstələrin sayı 1500-ə yaxındır. Hər il 40-60 yeni xəstə qeydiyyata alınır. Bu xəstəlik insan qanında laxtalanma faktorlarının çatışmazlığı nəticəsində əmələ gələn, anadan əsasən oğlan uşaqlarına irsən ötürülən xəstəlikdir. Hemofiliyalı xəstələr mütəmadi olaraq laxtalanma faktorları qəbul etmədikdə, dəfələrlə baş verən şiddətli qanaxmalar, oynaqlara və yumşaq toxumalara qansızmalar onların uşaq və gənc yaşlarında şikəst olmasına, bəzi hallarda isə ölümünə səbəb olur. Hemofiliyalı Xəstələrin Respublika Assosiasiyası hemofiliyalı xəstələrin vəziyyətinin yaxşılaşdırılması məqsədilə regionlarda xəstələrlə görüşüb, maarifləndirici tədbirlər aparır. Akademik Z.Əliyeva adına Naxçıvan şəhər poliklinikası belə bir tədbirə ev sahibliyi edib. Məqsəd hemofiliya xəstəliyinin profilaktikasını təşkil etmək, fəsadlarının qarşısını almaq üçün maarifləndirmə işləri aparmaqdan ibarət idi. Tədbirdə çıxış edən Hemofiliyalı Xəstələrin Respublika Assosiasiyasının prezidenti Gülnarə Hüseynova bildirib ki, son illər hemofiliyadan əziyyət çəkən insanların müalicəsi istiqamətində mühüm tədbirlər görülmüş,"Hemofiliya və talassemiya irsi qan xəstəlikləri üzrə Dövlət Proqramı"nın həyata keçirilməsi bu xəstələrə göstərilən tibbi yardımın təkmilləşdirilməsinə, onların laxtalanma faktorları ilə təminatının yaxşılaşmasına səbəb olmuşdur. Görülən tədbirlər nəticəsində hemofiliyalı xəstələrin normal həyat fəaliyyətinin təmin olunmasına, ömürlərinin uzanmasına, bu xəstəlikdən əlillik və ölüm hallarının azaldılmasına nail olunub. Amma buna baxmayaraq, hemofiliyalı xəstələrə göstərilən tibbi yardımın daha da təkmilləşdirilməsinə ehtiyac var. Belə ki, hemofiliyalı xəstələrdə qanaxmaların profilaktikası məqsədi ilə faktor preparatları ilə müalicənin təşkili, faktorlarla müalicə nəticəsində baş verən ağırlaşmaların aradan qaldırılması, artropatiyaların cərrahi reabilitasiyası üsullarının tətbiqi həllini gözləyən məsələlərdir. Hazırda icra olunan Dövlət Proqramı hemofiliyalı xəstələrə göstərilən tibbi yardımın həcminin və keyfiyyətinin artırılmasına yönəlib. “Hemofiliya daşıyıcısı olan xəstə müalicə aldıqda nə qədər yaşaya bilir?” sualına isə Hemofiliyalı Xəstələrin Respublika Assosiasiyasının regional direktoru Təranə Cəlilova aydınlıq gətirdi: “Hemofiliyalı insan düzgün və vaxtlı-vaxtında müalicə alarsa, sağlam insan nə qədər yaşayarsa, o qədər yaşayar. Çünki təhlükəsiz qandan istehsal olunmuş preparatlarla müalicə xəstələri bütün problemlərdən sığortalayır. Dövlət Proqramında nəzərdə tutulub ki, xəstələr təhlükəsiz qan faktorları ilə təmin olunacaqlar. Bu böyük bir məsələdir. Proqram çərçivəsində təhlükəsiz, keyfiyyətli müalicə nəticəsində əlilliyin qarşısı alınacaq və hemofiliyalı insanlar sağlam vətəndaşlardan seçilməyəcəklər. Ümüd edirik ki, onlar da sağlam vətəndaşlar kimi təhsil alacaqlar, işləyəcəklər və cəmiyyətdə öz yerlərini tutacaqlar. Tədbirdə mövzuya dair xronika və sənədli film göstərilib,slaydlar nümayiş etdirilib. Hemofiliyalı Xəstələrin Respublika Assosiasiyasının mətbuat katibi Fuad Rəsulun hemofiliyalı xəstələrə dövlət tərəfindən yardımlar edildiyini vurğulaylaraq bildirib ki, təmsil etdiyi Respublika Assosiasiyasının da bu sahədə müəyyən fəaliyyəti var. 31 dekabr Dünya Azərbaycanlılarının Həmrəyliyi Günü və Yeni il bayramı münasibətilə Azərbaycan Xalça Muzeyinin rəhbəri Röya xanım Tağıyevanın dəstəyi ilə Muzeydə “Xeyr deməyin, xeyir eləyin!” adlı Xeyriyyə aksiyasında “Sehrli Aləm” Cəmiyyətinin üzvü rəssam dizayner, moldovalı, əslən Qaqauz türkü olan Kirçu Yekaterina tərəfindən hazırlanmış “Yeni il aksesuarları”nın sərgi və satışı həyata keçirilib. Aksiyadan əldə olunan vəsaiti tam olaraq Hemofiliyalı Xəstələrin Respublika Assosiasiyasının hesabına köçürülüb və belə tədbirlər qurumun xeyriyyəçilik aksiyalarına imkan verir. Sonda tədbir iştirakçılarına “Hemofiliya haqqında nə bilirik?” və “Hemofiliya irsi xəstəlikdir” adı altında vərəqə, bukletlər və hemofiliya xəstəliyindən əziyyət çəkən 10 ailəyə bayram sovqatı təqdim olunub.

Hemofiliyalı Xəstələrin Respublika Assosiasiyası Mətbuat katibi Fuad Rəsul