İran prezidenti İbrahim Rəisinin helikopter qəzasında öldüyü rəsmən elan edildikdən sonra onun birinci müavini Məhəmməd Muhbir İran Konstitusiyasına uyğun olaraq səlahiyyətlərinin icrasına başlayacaq.

7NEWS.az xəbər verir ki, 1955-ci il sentyabrın 1-də Dezfulda anadan olan Muhbir bütün dövlət məsələlərində İbrahim Rəisi kimi son sözü deyən Xamneyiyə yaxın bir addır. O, İran-İraq müharibəsi zamanı İslam İnqilabı Keşikçiləri Korpusunun tibb korpusunda zabit kimi xidmət edib. Menecment və beynəlxalq hüquq kimi iki sahədə doktorluq dərəcəsi alan Məhəmməd Muhbir 2021-ci ildə birinci vitse-prezident olub. O, oktyabr ayında Moskvaya səfər edən İran rəsmiləri komandası arasında olub və Rusiya ordusunu yer-yer raketləri və əlavə pilotsuz uçuş aparatları ilə təchiz etməyi öhdəsinə götürüb. Eyni nümayəndə heyətinə İran İnqilabı Keşikçiləri Korpusunun iki yüksək vəzifəli şəxsi və Ali Milli Təhlükəsizlik Şurasının bir rəsmisi daxil idi.

Muhbir daha əvvəl dini liderin birbaşa nəzarətində olan "Setad” investisiya fondunun sədri olub.

7NEWS.az