İsrailin Vaşinqtondakı səfiri Yexiel Layter bildirib ki, aprelin 14-də ABŞ-nin liderliyi ilə keçirilən danışıqlarda livanlı həmkarı Nada Hamadə Moavvadla "Hizbullah"la atəşkəs barədə müzakirə aparmayacaq.

Bu barədə "The Times of Israel" qəzeti məlumat yayıb.

"İsrail dövləti hücumlarını davam etdirən və iki ölkə arasında sülhün bərqərar olmasına imkan verməyən "Hizbullah" terror təşkilatı ilə atəşkəs barədə müzakirə aparmaqdan imtina edib", - deyə Layter bildirib.

Livan hökuməti daha əvvəl səfirlərin atəşkəs danışıqlarını müzakirə etmək üçün aprelin 14-də ABŞ Dövlət Departamentinin binasında görüşmək barədə razılığa gəldiklərini bildirmişdi.

"Axios" nəşri isə yazıb ki, ABŞ və Livan İsraildən gələn həftə danışıqlar başlayana qədər "Hizbullah"ın mövqelərinə hücumları dayandırmasını istəyir.

Portalın mənbələrinə istinadən məlumatına görə, bəzi İsrail rəsmiləri buna razıdırlar və fasilə elan etməyin yəhudi dövlətinin maraqlarına uyğun olacağına inanırlar.

Nəşr vurğulayıb ki, Vaşinqtondakı İsrail və Livan səfirləri aprelin 10-da ABŞ-nin Dövlət katibi Marko Rubio ilə üçtərəfli telefon danışığı aparıblar. Bundan sonra Livan rəhbərliyi aprelin 14-də danışıqlar aparmaq barədə razılığa gəldiklərini açıqlayıb.