Millət vəkili Qənirə Paşayeva  Türkiyənin  paytaxtı Ankarada "25-ci ilində Xocalı qətliamı və ədalət arayışı ” adlı konfransda geniş məruzə ilə çıxış edib.

Ankarada Avrasiya Ekonomik İlişkiler Dərnəyi və Pursaklar bələdiyyəsinin təşkil etdiyi konfransda ilk öncə Xocalı soyqırımı qurbanları, Azərbaycan və Türkiyənin şəhidlərinin xatirəsi 1 dəqiqəlik sükutla yad edilib və Xocalı soyqırımı ilə bağlı sənədli film nümayiş etdirilib.

Tədbirin açılışında çıxış edən tədbirin təşkilaçısı Avrasiya Ekonomik İlişkiler Dərnəyinin başqanı Hikmet Eren, Pursaklar bələdiyyə başqanı Selcuk Çetin, Pursaklar kaymakamı İhsan Kara Xocalı Soyqırımı ilə bağlı çıxış edərək gənc nəsillərimizin tarixi həqiqətləri daha geniş bilməsinin və dünyaya daha geniş yayılmasında fəallıqlarını artırmalarının vacibliyindən danışıblar.

Şəhidlərimizi rəhmətlə anırıq deyə sözə başlayan millət vəkili Q. Paşayeva   Azərbaycan xalqının soyqırıma məruz qaldığını  dünyanın hər tərəfində yaşayan insanlara daha geniş şəkildə duyurmaq və bütün dünyanın Xocalı Soyqrımını bilməsi üçün hər yerdə konfranslar və tədbirlər təşkil edildiyini bildirib və Xocalı soyqırımının  bütün insanlığa qarşı edilmiş bir cinayət olduğunu deyib. 

Millət vəkili Qənirə Paşayeva ermənilərin 25 il əvvəl Xocalıda dinc azərbaycanlılara qarşı soyqırım törətdiklərini və insanlığa qarşı bir cinayət olan Xocalı Soyqırımını unutmayacağıq və unutdurmayacağıq, – deyib.  Xocalı Soyqırımını tanıyan qətnamələrin bir sıra ölkələr tərəfindən qəbul edilməsinə baxmayaraq Xocalı Soyqırımını törədənlərin hələ də ədalət qarşısında cavab vermədiklərini deyən millət vəkili Qənirə Paşayeva bu soyqırımı törədənlərin ədalət qarşısında hesab vermələrinin Azərbaycanın ən böyük hədəflərindən olduğunu qeyd etdi. Qənirə Paşayeva bildirib ki, harada doğulmasından və harada yaşamasından asılı olmayaraq hər bir Türk insanı Xocalı Soyqırımı, Qarabağ həqiqətlərinin, Ermənistanın işğal etdiyi Azərbaycan torpaqlarında törətdiyi vandalizm aktlarının dünyaya çatdırılması, bu soyqırımı törədənlərin öz layiqli cəzasını alması üçün çalışmalıdır. Millət vəkili  20-ci əsrin əvvəlində ermənilərin həm Anadolu, həm də Azərbaycan torpaqlarında, 20-ci əsrin sonunda müasir dünyanın gözləri qarşısında  Ermənistanın işğal etdiyi Azərbaycan torpaqlarında törətdiyi qətliamlar, soyqırımlardan danışıb və bildirib ki, dünyanın bəzi ölkələri var ki, gerçəkləri görmək istəmir və qondarma erməni soyqırımı ilə bağlı qərarlar qəbul edirlər. Bu yalanların qarşısının  alınmasının tək bir yolu var – birlikdə mübarizəmizi daha da gücləndirmək və həqiqətləri dünyaya birlikdə daha da geniş yaymaqdır. 

 

"Qondarma erməni soyqırımı iddialarına qarşı mübarizə, Qarabağ probleminin həlli, Xocalı soyqırımı həqiqətlərinin dünyaya daha da geniş yayılmasına çalımaq harada doğulub harada yaşamasından asılı olmayaraq bütün Türklərin əsas məsələsi olmalıdır. Biz bu iddiaların qarşısını almaq üçün həqiqətləri, gerçəkləri bütün dünyaya daha geniş şəkildə çatdırmalıyıq”, – deyə millət vəkili əlavə edib.

Bu məsələdə türk gəncliyinin üzərinə böyük vəzifə düşdüyünü qeyd edən millət vəkili Qənirə Paşayeva bütün türk gəncliyini tariximizə sahib çıxmağa, sosial mediada, virtual aləmdə fəal olmağa çağırıb və qondarma erməni soyqırımı iddialarına qarşı mübarizədə və Azərbaycan həqiqətlərinin daha geniş şəkildə yayılması məqsədilə sosial mediada səylərin artırılmasının, işinin sürətləndirilməsinin vacibliyini qeyd edib:” Biz sadəcə olaraq ədalət istəyirik! Xocalıda, Qaradağlıda soyqırım törədən cinayətkarlar Ermənistanda önəmli vəzifədədirlər. Hələ də ədalət qarşısında törətdikləri cinayətə görə cavab verməyiblər. Dünyanın  insan haqları deyərək  bar-bar bağıran təşkilatları, dövlətləri 1 milyon insanın öz evində yaşama hüququnun Ermənsitan tərəfindən  pozulmasına səs çıxartmırlar! ATƏT-in Minsk Qrupunun digər həmsədrləri ABŞ və Rusiya da bu istiqamətdə Ermənistana heç bir təzyiq və təsir göstərmirlər. Xocalı Soyqırımından danışmayanlar qondarma erməni soyqırımı yalanları ilə türk millətinə tarixdə olmayan bir soyqırımı zorla qəbul etdirmək üçün Ermənistan və erməni diasporuna ciddi dəstək verirlər. Yalana qarşı ən ciddi mübarizə isə doğruları, həqiqətləri anlatmaqdır və dünyanın hər yerində yaşayan türk kökənli insanlar Xocalı Soyqırımı həqiqətlərinin daha geniş yayılmasına çalışmalıdırlar. Bu Xocalı Soyqırımı da daxil olmaqla Ermənistanın işğal etdiyi Azərbaycan torpaqlarında məsum insanlarımızı qətlə yetirən bütün cinayətkarların, qatillərin ədalət qarşısında cavab verməsinə nail olmalıyıq və torpaqlarımızı işğaldan azad etməliyik." Millət vəkili Q.Paşayeva Ankaradan müsəlman dünyasına səslənib: "Xocalı soyqırımını törədən canilərin ədalət qarşısında cavab verməsi üçün Azərbaycana daha çox dəstək  verməlisiniz".

 

Tədbirin sonunda  Azərbaycanın Əməkdar Artisti Nuriyyə Hüseynova "Xocalı laylası” və "Ayağa qalx ey Türk oğlu” əsərlərini  ifa edib. Tədbirin sonunda millət vəkili Q.Paşayevaya və Azərbaycanın Əməkdar artisti Nuriyyə Hüseynovaya təşkilatçılar tərəfindən plaketlər təqdim olunub. Tədbirdən sonra millət vəkili Q.Paşayeva Pursaklar bölgəsininn fəal  gəncləri, gənclər və qadın təşkilatları ilə görüşüb və fikir mübadiləsi aparıb.

Millət vəkili Q.Paşayeva gənclərin oxuması üçün həmmüəllifi olduğu "Karabağ hikayeleri" kitabından çoxlu sayda Pursaklar bələdiyyəsi və Avrasiya Ekonomik İlişkiler Dərnəyinə hədiyyə edib. 

 

 

7News.az