Niderlandda tibb müəssisəsinin 12 işçisi altı həftəlik profilaktik təcridə yerləşdirilib. Buna səbəb onların hantavirusa yoluxmuş xəstə ilə davranış qaydalarını pozmaları olub.

Bu barədə "RTL Nederland" telekanalı xəstəxananın rəsmi bəyanatına istinadən məlumat verib.

"12 əməkdaş ehtiyat tədbiri olaraq altı həftəlik profilaktik karantinə göndərilir", - deyə məlumatda bildirilib.

Xəstə "MV Hondius" kruiz gəmisində səyahətdən sonra Neymegen şəhərindəki klinikaya daxil olub. Xəstəxanaya yerləşdirilərkən ondan qan götürülüb və nümunə adi laborator standartlara uyğun olaraq emal edilib, baxmayaraq ki, virusun spesifikası daha sərt təhlükəsizlik tədbirləri tələb edirdi.

Daha sonra məlum olub ki, biomaterialların utilizasiyası zamanı yenilənmiş beynəlxalq tələblər nəzərə alınmayıb.

"Yoluxma riski böyük deyil", - deyə səhiyyə müəssisəsinin yaydığı bəyanatda qeyd edilib.