İran Prezidenti Məsud Pezeşkian bildirib ki, düşmən qüvvələr ölkə iqtisadiyyatına təzyiq göstərərək ictimai narazılıq yaratmağa çalışırlar.

 

7News.Az xarici mətbuata istinadən xəbər verir ki, o vurğulayıb ki, həm istehsalçıların maraqları, həm də istehlakçıların məmnuniyyəti qorunmalıdır.

İranın rəsmi xəbər agentliyi IRNA-nın məlumatına görə, Pezeşkian Tehranda aidiyyəti nazirlər və ticarət birliklərinin nümayəndələri ilə keçirilən iqtisadi iclasda iştirak edib.

Görüş zamanı bazarlardakı mövcud vəziyyət, qiymət dalğalanmaları, inflyasiya ilə mübarizə, müharibə şəraitində zəruri malların təminatı və istehsal sektorundakı vəziyyət müzakirə olunub.

Pezeşkian çıxışında bildirib ki, müharibə şəraitində ehtiyat yığımının, paylama şəbəkəsində pozuntuların və nəzarətsiz qiymət artımlarının qarşısını almaq üçün istehsaldan istehlaka qədər bütün mərhələlər davamlı şəkildə nəzarətdə saxlanılmalıdır.

Prezident qeyd edib ki, cəmiyyətin əsas ehtiyacları dəqiq müəyyənləşdirilməli, tələb və təklif arasında balans qorunmalıdır. Onun sözlərinə görə, bu yanaşma həm milli resurslardan səmərəli istifadəyə, həm də bazarda sabitliyin təmin olunmasına şərait yaradacaq.

Pezeşkian əlavə edib ki, hazırkı şəraitdə düşmənin əsas hədəflərindən biri iqtisadiyyatı zəiflətmək və insanların sosial rifahına təzyiq göstərməkdir.

"Biz elə siyasət yürütməliyik ki, həm istehsalçıların mənfəəti qorunsun, həm də istehlakçıların ehtiyac və məmnuniyyəti təmin edilsin”, – deyə İran prezidenti vurğulayıb.

 

7News.Az