Müasir beynəlxalq münasibətlər sistemi dərin transformasiya mərhələsindən keçir. Dünyanın müxtəlif bölgələrində baş verən silahlı münaqişələr, geosiyasi qarşıdurmalar və iqtisadi gərginliklər qlobal təhlükəsizlik arxitekturasını ciddi şəkildə sarsıdır. Xüsusilə Rusiya-Ukrayna müharibəsi və Yaxın Şərqdə gərginliyi artıran ABŞ-İran qarşıdurması beynəlxalq sabitlik üçün əsas təhdidlər sırasındadır. Bu mürəkkəb fonda regionlarda sabitliyin qorunması və sülhün təmin edilməsi hər bir dövlət üçün prioritet məsələyə çevrilib.
Belə bir şəraitdə Azərbaycan özünün balanslı, praqmatik və milli maraqlara əsaslanan xarici siyasəti ilə seçilir. Xüsusilə İkinci Qarabağ müharibəsi nəticəsində əldə edilən qələbə ölkənin yalnız hərbi deyil, həm də diplomatik gücünün göstəricisinə çevrildi. Bu qələbə ilə Azərbaycan beynəlxalq hüququn norma və prinsiplərini bərpa edərək regionda yeni reallıq formalaşdırdı.
Azərbaycan Respublikasının Prezidenti İlham Əliyev müasir dövrdə çevik və uzaqgörən siyasət yürüdərək ölkənin mövqelərini möhkəmləndirməyi bacarmışdır. Onun rəhbərliyi ilə həyata keçirilən xarici siyasət kursu bir neçə əsas prinsipə əsaslanır: milli maraqların qorunması, çoxtərəfli əməkdaşlıq, regional sabitlik və qlobal tərəfdaşlıq. Prezidentin beynəlxalq platformalarda aktiv iştirakı və təşəbbüsləri Azərbaycanın etibarlı tərəfdaş kimi imicini gücləndirmişdir.
44 günlük müharibədən sonra Azərbaycanın əsas prioritetlərindən biri regionda davamlı sülhün təmin edilməsidir. Bu istiqamətdə ölkə konstruktiv mövqe sərgiləyərək kommunikasiyaların açılması, iqtisadi əməkdaşlığın genişləndirilməsi və qarşılıqlı etimadın formalaşdırılması üçün mühüm addımlar atır. Azərbaycanın təşəbbüsləri nəticəsində Cənubi Qafqazda yeni əməkdaşlıq formatlarının yaranması müşahidə olunur.
Eyni zamanda Azərbaycan qlobal enerji təhlükəsizliyinin təmin edilməsində də mühüm rol oynayır. Avropanın enerji mənbələrinin şaxələndirilməsi siyasətində ölkənin iştirakı onun strateji əhəmiyyətini daha da artırmışdır. Bu kontekstdə Azərbaycan yalnız regional deyil, həm də qlobal miqyasda etibarlı tərəfdaş kimi çıxış edir.
Prezident İlham Əliyevin həyata keçirdiyi uğurlu xarici siyasət Azərbaycanın beynəlxalq nüfuzunu əhəmiyyətli dərəcədə artırmışdır. Onun təşəbbüsləri ilə ölkə bir çox beynəlxalq təşkilatlarda fəal iştirak edir, sülhə və təhlükəsizliyə töhfə verən layihələr həyata keçirir. Azərbaycanın Qoşulmama Hərəkatına sədrliyi dövründə irəli sürdüyü təşəbbüslər də qlobal həmrəyliyin gücləndirilməsinə xidmət etmişdir.
Nəticə etibarilə, qlobal qeyri-sabitliyin artdığı bir dövrdə Azərbaycanın yürütdüyü müstəqil və balanslı xarici siyasət modeli nümunə kimi qiymətləndirilə bilər. Prezident İlham Əliyevin liderliyi ilə ölkə həm regionda sülhün bərqərar olunmasına, həm də beynəlxalq təhlükəsizliyin möhkəmləndirilməsinə mühüm töhfələr verməkdə davam edir.
Səbuhi Abbasov
7NEWS.az saytının baş redaktoru,
QHT sədri
