Türkiyənin Suriyanın İdlib vilayətinə yeritdiyi məhdud hərbi kontingentin tərkibindəki hava qüvvələri daha bir uğurlu əməliyyat keçiriblər.
7News.Az bildirir ki, İdlib vilayətindəki Sərakib şəhəri uğrunda gedən döyüşlərdə Türkiyənin "Bayraktar TB-2" uçan pilotsuz aparatı (UPA) Suriya ordusunun "Pantsir S1" (SA-22) zenit-raket artilleriya sistemini dəqiq atəşlə məhv edib.
"Pantsir"in yanındakı termal kamera izləri onun Türkiyə hərbi təyyarələrinə atəş açdığını göstərir.
Beləliklə, Türkiyə İdlibdə "Bahar sipəri" əməliyyatı başlayandan bəri artıq 2 "Pantsir"i məhv edib.
Dünən axşam saatlarında Hələb şəhəri yaxınlığında Suriya ordusunun 2 zenit-raket kompleksi məhv olunub.
Xatırladaq ki, Rusiya "Pantsir S1" sistemini "dünyanın ən mükəmməl hava hücumundan müdafiə sistemi", "vurulması mümkün olmayan sistem" kimi reklam edir.
