Babayev hadisəni qısqanclıq zəminində törədib.

Bakı Ağır Cinayətlər Məhkəməsində Bakı ş. sakini Maarif Babayevin (1981-ci il təv.) CM-nin 126.2.4-cü (ümumi təhlükəli üsulla, qəsdən sağlamlığa ağır zərər vurma) və 221.3-cü (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddələri ilə təqsirləndirilməsinə dair cinayət işi üzrə məhkəmə prosesi başa çatıb. 

Xəzər RPİ 2-ci polis bölməsi əməkdaşlarının keçirdikləri əməliyyat-axtarış tədbirləri nəticəsində ötən il sentyabrın 11-də, axşam saat 23 radələrində Binə qəsəbəsinin Bünyadzadə küçəsində, qəsəbə sakini Rauf Rzayevə (1980-ci il təv.) bıçaqla ağır bədən xəsarəti yetirməkdə şübhəli bilinən Maarif Babayev tutulub. Zərərçəkən 3 saylı kliniki xəstəxanaya çatdırılmaqla, üzərində cərrahi əməliyyat aparılıb və həyatı xilas edilib. 

Cinayət işinin materiallarına görə, Maarif Babayev hadisəni qısqanclıq zəminində törədib, belə ki, hadisədən öncə o, qeyri-rəsmi yaşadığı qadını Rauf Rzayevlə görüb və bu məsələni aydınlaşdırmaq üçün onunla mübahisə edib. 

Məhkəmənin hökmü ilə təqsirləndirilən şəxs 10 il müddətinə azadlıqdan məhrumetmə cəzasına məhkum olunub. 

 7news.az