Daxili orqanarı anadangəlmə bayırda olan 3 yaşlı Lorel Fayzakli bir neçə əməliyyat keçirdikdən sonra xəstəxanadan evə buraxılıb.

Bu barədə "Metro" yazır.

Belə ki, 6 iyun 2018-ci il tarixində, İngiltərənin Kembric şəhərində dünyaya gələn Lorel hələ ana bətnində, 12-ci həftədə olarkən dölə omfalosel (qöbək dəliyinin tam bağlanmaması və qarın içi orqanların göbək ciyəsinə qaçması) diaqnozu qoyulub.

Həkimlər uşağın anası Kelliyə hamiləliyi dayandırmağı məsləhət görüblər, lakin qadın razılaşmayıb və uşağı saxlamaq qərarına gəlib. Valideynlərə bildirilib ki, adətən bu xəstəliyi olanların orqanlarını doğuluqda daxilə salırlar, lakin Loreldə orqanlar çox böyük olduğundan uşağın 3 yaşını gözləməli olublar.

2021-ci ilin yay aylarında Lorel bir neçə ağır əməliyyat keçirib və hazırda normal tərzdə həyatına davam edə bilər. O, xəstəxanada 3 ayadək qalmalı idi, lakin tez reabilitasiya olduğundan cəmi bir həftə sonra evə buraxılıb.

İlk zamanlar qarnının yeni görünüşündən qorxsa da, Lorel tez bir zamanda yeni görünüşünə alışıb və hazırda özünü yaxşı hiss edir.

Bir il sonra o, məktəbə getməyə hazırlaşır.

"Özümü daha sərbəst hiss edirəm. İstəyirəm ki, qızım daha çox işləri müstəqil şəkildə özü görə bilsin, məsələn, rahatlıqla dostlarıyla oynasın", - deyə Kelli hisslərini bildirib.