Sudanda vəbaya yoluxanların sayı 26 mini keçib.

7News.Az xarici mediaya istinadən xəbər verir ki, Sudan Səhiyyə Nazirliyindən verilən açıqlamada ölkədə vəbaya yoluxanların ümumi sayının 26 min 472-yə yüksəldiyi bildirilib.

Açıqlamada vəba epidemiyasından ölənlərin sayının 737-yə yüksəldiyi qeyd edilib.

Sudanda iyun ayında başlayan leysan yağışlar və daşqınlar vəba xəstəliyinin yayılmasına səbəb olub. Sudan hakimiyyəti avqustun 12-dən vəba xəstəliyini epidemiya elan edib.

Qeyd edək ki, Birləşmiş Millətlər Təşkilatının Humanitar Məsələlər üzrə Koordinasiya Ofisi (OCHA) oktyabrın 1-də 3 milyondan çox sudanlı uşağın epidemiya riski altında olduğunu bildirib. Birləşmiş Millətlər Təşkilatının Uşaq Fondu (UNICEF) oktyabrın 5-də Sudana 1.5 milyon doza vəba peyvəndi göndərdiyini açıqlayıb.