Xarici ölkələrdə maska istehsalının uzun müddətdir olmasına baxmayaraq maska qıtlığına rast gəlinir. Maraqlıdır, görəsən belə olan halda koronavirus pandemiyasının ölkəmizdə sürətlə yayılması ilə apteklərdə yenidən maska qıtlığı yaşanacaqmı?
Məsələ ilə bağlı iqtisadçı ekspert Natiq Cəfərli 7news.az-a açıqlama verib. O bildirib ki, maska çatışmazlığı məsələsi hələ ki gündəmdədir. Bu yerli istehsalın həcmindən və çatdırılmasından asılı olacaq: "İstehsal olunan maskalar çoxsaylı istifadə üçün nəzərdə tutulmayıb. Bu maskalar maksimum 3 saatdan bir dəyişdirilməlidir. İnsanlar gün ərzində 4-5 belə maska istifadə etməlidir ki, effekti olsun. Həmin maskalar çox istifadə olunarsa, əksinə virus mənbəyinə çevrilə bilər. Maska çatışmazlığının yaşanıb yaşanmaması istehsalın həcmindən asılı olacaq. Bizdə xammal xaricdən alınır. Həmin xammala da bütün dünyada böyük tələbat var. Ola bilər ki, xammalla tədarükdə problemlər yaşansın. Bu problem də nəticədə maska qıtlığına səbəb ola bilər”.
İqtisadçı maska istehsalınının qiymətlərə təsirindən də danışıb: "Böyük həcmdə istehsal olunarsa qiymətlərə də təsir edəcək. Amma bununla bağlı hələlik məlumat yoxdur”.
