RU
lombard
Xətai məktəblilərinə “Diaspor dərsi” keçirilib
11:52
231

Xətai məktəblilərinə “Diaspor dərsi” keçirilib

Noyabrın 26-də Diaspor Jurnalistləri Birliyinin “Orta məktəblərdə diaspor dərsləri” layihəsi çərçivəsində növbəti “Diaspor dərsi” Xətai rayonundakı 265 saylı tam orta məktəbdə keçirilib.

Öncə 265 saylı məktəbin direktoru Yeganə Qurbanova çıxış edərək DJB-nin bu təşəbbüsünü yüksək qiymətləndirib və layihənin şagirdlərin diasporla bağlı maariflənməsində əhəmiyyətli rol oynayacağını deyib.
DJB sədri Fuad Hüseynzadə bildirib ki, layihənin məqsədi şagirdlərin Azərbaycan diasporu haqda düşüncəsini inkişaf etdirmək, sərhədlərimizin hüdudlarından kənarda da milyonlarla həmvətənimizin yaşaması haqda məlumat verməkdir.
O, diasporumuzun Azərbaycanın xaricdəki siması olduğunu deyib: “Azərbaycançılıq ideologiyası diasporumuzun həmrəyliyi üçün ideoloji bünövrədir. Məqsəd diasporumuzun vətənlə əlaqələrinin möhkəm olmasıdır”.
Diasporla iş üzrə Dövlət Komitəsinin əməkdaşı Əbülfəz Şeydabəyov deyib ki, milli diasporumuzun taleyi Azərbaycanın dövlətçilik tarixinin həm işıqlı, həm dramatik səhifələrinə bənzərdir. Əbülfəz Şeydabəyovun sözlərinə görə, keçmişimizdən bu günə ölkəmizdə və dünyada yaşanan siyasi proseslərin diasporumuzun formalaşmasına ciddi təsirləri olsa da onu zəiflədə bilməyib: “Hazırda xarici ölkələrdə sürətli şəkildə təşkilatlanmağa başlayan azərbaycanlı diaspor birliklərinin sayı günümüzdə 450-i keçib. Sovetlər Birliyi zamanı xaricdə yaşayan soydaşlarımız Ana Vətənə heç səfər edə bilmirdilərsə, müstəqillikdən sonra Azərbaycanla bütövləşən dünya azərbaycanlıları bu gün milli maraqlar ətrafında sıx birləşiblər”.
Hollandiya-Azərbaycan Evinin rəhbəri Elxan Mirhəşimli öz diaspor fəaliyyətindən danışıb: “Məqsədimiz Hollandiyadakı azərbaycanlıların yerli xalqa inteqrasiyasını daha da artırmaqdır. Ümumiyyətlə, hədəfimiz hollandlara öz tariximiz, mədəniyyətimiz, milli kimliyimizi tanıtdırmaqdır. Yəni hollandlar görsünlər ki, biz necə millətik”. O deyib ki, Azərbaycandan gəlib Hollandiyada təhsil alan gənclərimizə dəstək olurlar.
ABŞ-da orta məktəb təhsili alan Suliddin Bağırov bildirib ki, Azərbaycan gəncinin formalaşmış bir dünyagörüşü var. O, azərbaycanlı gənclərin elmi bilikləri, ümumiyyətlə, dünyagörüşlərinə görə bir çox ölkələrin gənclərindən öndə olduğunu deyib: “ABŞ məktəbliləri bir çox hallarda dünyanın başqa ölkələri haqda məlumatsız olurlar və ya müəyyən stereotiplərə sahibdirlər. Azərbaycanı tanıtmağa başlayanda bir çox məktəbli dostlarımın heyrətlə xəritəyə baxdığının şahidi oldum”.
Suliddin Bağırov qeyd edib ki, ABŞ-da təhsil aldığı müddətdə 105 saat könüllü fəaliyyətinə görə prezident Barak Obama tərəfindən “Könüllü xidmət” mükafatına layiq görülüb.
Qeyd edək ki, “Diaspor dərsi” diskussiya şəraitində keçib və şagirdlərin sualları cavablandırılıb.
Nəzərə çatdıraq ki, layihə çərçivəsində Bakının 12 məktəbində 10-11-ci sinif şagirdlərinə “Diaspor dərsi”nin keçirilməsi nəzərdə tutulub.

7news.az

 

BÖLMƏNİN DİGƏR XƏBƏRLƏRİ