Keçmiş güləşçi, milliyətcə erməni olan iş adamı Hayk Aturyunyan Rusiyanın Moskva vilayətinin Krasnoqorsk şəhər rayonunun Qalevo kəndindəki şəxsi evində güllələnib.

Bu barədə  Ermənistan mətbuatı xəbər verib.

Qeyd edilir ki, hadisə noyabrın 8-də baş verib. İş adamının həyat yoldaşı evin qapısı üzərindəki müşahidə kamerasında köhnə tanışları, milliyyətcə erməni Aşot adlı şəxsin (ad şərtidir-red) onların evinə gəldiyini görüb və qapını açıb.

Otaqda qonaqla Hayk arasında qısa müddətlik söhbətdən sonra ev sakinləri tüfəngdən açılan atəş səsi eşidiblər. İş adamının kürəkəni Hayka atəş açan Aşotu zərərsizləşdirmək istəsə də, buna nail olmayıb. Aturyunyanın həyat yoldaşı yaralanmış ərini xəstəxanaya aparıb, lakin iş adamı aldığı xəsarətlərdən tibb müəssisəsində vəfat edib.

Faktla bağlı Rusiya İstintaq Komitəsinin Moskva əyaləti üzrə Baş İstintaq İdarəsi tərəfindən Cinayət Məcəlləsinin qətl maddəsi üzrə cinayət işi açılıb. Hadisəni törədən şəxs hələ saxlanılmayıb./report

7NEWS.Az