lombard

Beyləqan Məşğulluq Mərkəzində rüşvət FAKTI – İlham Quliyev də həbs edilə bilər

Beyləqan Məşğulluq Mərkəzində rüşvət FAKTI – İlham Quliyev də həbs edilə bilər

"İşsizin DOST”u proqramının "mehriban DÜŞMƏNi” Və yaxud Beyləqanın məşğulluq müdiri İlham Quliyevin "ASAN imza” tələsi

Bildiyimiz kimi, Azərbaycan Respublikasının yerli icra hakimiyyəti orqanlarının vəzifəli şəxsləri tərəfindən vətəndaşların hüquqlarına, dövlətin qanunla qorunan mənafelərinə zərər vuran, dövlət orqanlarının fəaliyyətinə kölgə salan qanunsuz əməlləri törədənlərə qarşı ciddi mübarizə tədbirləri həyata keçirilməkdədir.

Son iki-üç ayda Ağstafa, Yevlax, Neftçala rayonlarının rəhbər vəzifəli şəxslərinin səlahiyyətlərindən qulluq mənafeyinə qəsdən zidd olaraq istifadə edib vətəndaşların hüquqlarına, cəmiyyətin və dövlətin qanunla qorunan mənafelərinə mühüm zərər vuran çoxsaylı cinayət əməllərinə yol vermələrinə dair məlumatlar əsasında, kompleks araşdırma tədbirləri aparılmışdır.

Neftçalada həyata keçirilən əməliyyat həm də onu göstərdi ki, təkcə rayon icra hakimiyyəti başçılarından deyil, həm də onların korrupsiya ortaqları olan orta ranqlı məmurlardan da məsuliyyət sorulur. Belə ki, rüşvət alma və rüşvət vermə ilə bağlı faktlara görə rayon İcra Hakimiyyətinin başçısı İsmayıl Vəliyevlə bərabər, onun müavinləri Vurğun Əkbərov, Gültəkin Sadıqova, Memarlıq və tikinti şöbəsinin müdiri Vüqar Nağıyev, Ərazi idarəetmə və yerli özünüidarəetmə orqanları ilə iş şöbəsinin müdiri Anar Cəfərov, rayon Mərkəzi Xəstəxanasının baş həkimi Telman Zahidov, rayon Təhsil şöbəsinin müdiri Əjdər Kərimov da Cinayət Məcəlləsinin müvafiq maddələri ilə şübhəli şəxs qismində saxlanılmışlar. Hazırda cinayət işi üzrə bütün halların tam, hərtərəfli araşdırılmaqla təqsirli şəxslərin dairəsinin müəyyənləşdirilərək istintaqa cəlb olunması istiqamətində zəruri istintaq-əməliyyat tədbirləri davam etdirilir. Ehtimal böyükdür ki, təqsirli şəxslərin dairəsinə yerli məşğulluq idarəsinin rəisi də cəlb oluna bilər. Çünki, istintaq araşdırmaları ilə həmçinin, dövlət qayğısı ilə əhatə olunmuş işsiz və aztəminatlı vətəndaşların ictimai işlərə cəlb edilərək aylıq qazanc əldə edə bilmələri üçün onlara məxsus əməkhaqqı kartlarının İsmayıl Vəliyev tərəfindən müxtəlif adlar altında ələ keçirilməsinə də əsaslı şübhələr müəyyən edilmişdir.

Fəaliyyəti araşdırılması gərəkən qurumlardan biri də Beyləqan rayon Məşğulluq Mərkəzi, əməlləri vətəndaşların hüquqlarına, dövlətin qanunla qorunan mənafelərinə zərər vurma, dövlət orqanlarının fəaliyyətinə kölgə salma şübhəsi doğuran vəzifəli şəxslərdən biri isə həmin Mərkəzin rəisi İlham Quliyevdir.

Xatırladaq ki, İlham Quliyev Füzuli Ələkbərovun Əmək və Əhalinin Sosial Müdafiəsi naziri olduğu dövrdə Beyləqan rayon Əhalinin Sosial Müdafiəsi Mərkəzinin direktoru vəzifəsində işləyib. Həmin dönəmdə onun barəsində vətəndaşlardan yuxarı instansiyalara çoxsaylı şikayətlər göndərilib, KİV-də haqqında xeyli tənqidi yazılar dərc olunub. Səlim Müslümov nazir olandan sonra İlham Quliyevi işdən qovub. Bir ara Beyləqan bazarında müxtəlif çeşidlərin alveri ilə başını girləyən İlham Quliyev Səlim Müslümov nazir postundan gedəndən sonra sələfinin kadrlarını uzaqlaşdıraraq öz komandasını formalaşdıran yeni nazir Sahil Babayevə yaxınlaşmağı bacarıb. ƏSMM-də Daxili Nəzarət İdarəsinin müdiri vəzifəsinə gələn Heybət İmanovun vasitəsilə Beyləqan Məşğulluq Mərkəzinə direktor təyinatı alıb. Səlim Müslümovun dövründəki ab havanı yenidən dirçəldən mərkəz direktoru işsizlik adı altında yaxınlarının, dost tanışlarının adını işsizlər siyahısına yazdırıb. KİV-ə ayaq açan şikayətlərdə bildirilir ki, mərkəz direktoru işsiz statusu ilə təmin etdiyi şəxslərə verilən pulun ən azı 6 ayını əvvəlcədən alır. İlham Quliyevdə həmçinin onlarla kartın olduğu iddia olunur.

https://realmedia.az/wp-content/uploads/2020/02/Səlim_Müslümov_2018.jpg 310w" alt="" width="291" height="300" style="overflow-wrap: break-word; max-width: 100%; height: auto; float: right; margin: 5px 0px 0px 1em;" />Bildiyimiz kimi, ölkə Prezidenti İlham Əliyevin sosial təşəbbüsü əsasında əhalinin məşğulluğunun təmin edilməsi məqsədilə haqqı ödənilən ictimai işlərin təşkil olunması məqsədilə Əmək və Əhalinin Sosial Müdafiəsi Nazirliyinin tabeliyində Dayanıqlı və Operativ Sosial Təminat Agentliyi nəzdində "DOST İş Mərkəzi” Məhdud Məsuliyyətli Cəmiyyəti yaradılıb. Yeni yaradılmış həmin "DOST İş Mərkəzi” MMC-yə heç bir peşə hazırlığı və ixtisas tələb olunmayan işçilər tələb olunur. Bu işlərə sosial xidmətlərin göstərilməsi, təmir, abadlaşdırma, ərazilərin ekoloji sağlamlaşdırılması, o cümlədən yaşıllaşdırma işləri, parklara, ictimai yerlərə qulluq və s. daxildir. Prosedura görə "İşsizin DOST-u proqramı əsasında işə cəlb olunanlar məhz məşğulluq orqanlarında işsiz və işaxtaran kimi qeydiyyatda olan vətəndaşlar arasından müəyyən edilir. Məşğulluq mərkəzlərinin müvafiq göndərişi əsasında həmin şəxslərlə DOST İş Mərkəzində əmək müqaviləsi bağlanılır və elektron informasiya sistemində qeydiyyatdan keçirilərək rəsmiləşdirilir. Hər bir işçi üçün sifariş olunmuş əməkhaqqı kartını bank yalnız vətəndaşın özünə verir. Kartı əldə etmək üçün vətəndaş şəxsiyyət vəsiqəsini təqdim edir, müvafiq sənədə imza atır”. İşə qəbul zamanı vətəndaşlarla əmək müqaviləsi bağlanır və elektron sistemdə qeydiyyatdan keçirilərək rəsmiləşdirilir, işçinin sosial müdafiə hüquqları təmin edilir. "İşə qəbul edilmiş şəxslərin siyahısı müvafiq rayon (şəhər) İcra Hakimiyyətlərinin yerli qurumlarına (Mənzil Kommunal Təsərrüfatı Birlikləri, yaşıllaşdırma, tikinti-təmir idarələri və s.) təqdim edilir və bu qurumlar onları ictimai işlərə cəlb edir. Başqa işəgötürənlər də Məşğulluq Mərkəzinə boş iş yerləri haqda məlumat təqdim edirlər. Məşğulluq Mərkəzi tərəfindən işsiz və işaxtaran vətəndaşlara həmin boş iş yerlərinə  göndəriş vərəqələri verilir.

Problem budur ki, İlham Quliyev vətəndaşların işsiz və işaxtaran kimi məşğulluq mərkəzində qeydiyyata durmaq qaydasına özünün lüzumsuz əlavələrini edib. Məsələn, şəxslər elektron informasiya sistemində elektron ərizəni doldurduqdan sonra işaxtaran kimi qeydiyyata alınırlar. Şəxs işaxtaran kimi qeydiyyata alındığı zaman onun elektron informasiya sisteminə daxil etdiyi məlumatlar əsasında elektron qaydada fərdi məşğulluq vərəqi tərtib edilir. Hoqqalardan biri odur ki, elektron ərizəni doldurmağı bacarmayan şəxslərə təmənnasız köməklik göstərilmir, onlara 30 manat ödəyib "ASAN imza” açdırmaq, İlham Quliyevin rayonun müxtəlif yerlərindəki inhisarında olan komputer mərkəzlərində bu işi 15 manata gördürmək təklif olunur. Prosedurun ən üzücü mərhələsi isə İlham Quliyevin sənədlərini qəbul etdiyi işsiz vətəndaşla fərdi söhbətidir. Direktor əlinin altında bir-bir çevirdiyi sənədlərə sanki inanmırmış kimi işaxtaran vətəndaşa artıq suallar verir. Məsələn, soruşur ki, barəsində azadlıqdan məhrumetmə və ya tibbi xarakterli məcburi tədbirlərin tətbiqinə dair məhkəmənin qanuni qüvvəyə minmiş qərarı varmı. DSMF-in arayışı ortada olduğu halda belə cavan adamlara (ələxüsusda gənc işaxtaran xanımlıara)sual edir ki, yaşa görə əmək pensiyası və ya yaşa görə müavinət alırlarmı, adlarına torpaq sahələri varmı. Əksinə, yaşlı adamları sorğu-suala tutur ki, onlar ali və orta ixtisas təhsil müəssisəsində oxuyurlarmı. Şəxsin torpaq sahəsinin olmadığını təsdiqləən arayışı isə ƏMDK-nin erli qurumundan almaq da xərc tələb edir.

İlham Quliyev təqdim olunmuş sənədləri və məlumatları zərrəbinlə gözdən keçirərək onlarda təhrif olunmuş və ya düzgün olmayan məlumatlar "aşkar etməyə” çalışır. İlham Quliyevin ümumiyyətlə, cəmiyyətin "axırıncı sort”, geridə qalmış zümrəsi  hesab etdiyi, "yuxarıdan aşağı” baxdığı işsizlər sırasında ən çox çək-çevirə saldığı şəxslər isə qadın cinsinə mənsub işaxtaranlardır. Direktor söhbət əsnasında çörək qazanmaq xatirinə küçə süpürməyə, zibil daşımağa hazır olan bu qadınların əxlaqına da bələd olmaq istəyir. Halbuki, bu, onun kompetensiyasına aid olan məsələ deyildir.

Belə bir məsəl var: Dostunu göstər – sənin kim olduğunu deyim. Xatırladaq ki, "Realmedia.az” saytı keçən ilin may ayında 40 nəfərdən artıq vətəndaşların şikayətləri, göndərdikləri video və audio-materiallar və saytın əməkdaşlarının apardıqları araşdırmalar əsasında "Azəraqrar Dövlət İstehsalat və Emal Birliyi” MMC-nin rəhbəri Anar Hüseynov, MMC-nin – Beyləqandakı Aran Regional İdarəsinin rəisi Hikmət Ağayev və digər struktur vahidləri rəhbərləri barəsində tənqidi yazılar dərc edəndə də Beyləqan rayon Məşğulluq Mərkəzinin müdiri İlham Quliyev də yaxın dostu, adı vaxtilə FETÖ-nün Azərbaycandakı şəbəkəsi ilə işbirliyində hallanan Anar Hüseynova dəstək vermək üçün başını başlara qoşmuşdu. Bildirilirdi ki, Məşğulluq müdiri "parçala və hökm sür” prinsipi ilə şikayətçiləri bir-bir çağıraraq onları öz kabinetindən qurduğu telefon əlaqəsi ilə Anar Hüseynovla danışdırırmış. Həm İlham Quliev, həm də Anar Hüseynov hərəsi öz növbəsində həmin şəxslərə vəd verirmişlər ki, bu məsələdən geri çəkilsinlər, əvəzində özlərini və ailə üzvlərini işlə təmin edəcəklər. Bir sözlə, "parçala və hökm sür” siyasəti yürüdüblər.

P.S. Məlumat üçün qeyd edək ki, keçən ilin yanvar ayında Zaqatala Rayon Məşğulluq Mərkəzinin direktoru Musa Feyzullayev intihar edib, Cəlilabad rayon Məşğulluq Mərkəzinin direktoru vəzifəsini icra edən Mehdi Abasov və Mərkəzin baş məsləhətçisi Hafis Allahyarov isə korrupsiya ittihamı ilə həbs olunublar. Görünən odur ki, İlham Quliyev də yolun sonuna gəlib. Adlarını çəkdiyimiz həmkarlarının aqibətini bölüşməsini arzulamırıq. Elə üzüsulu vəzifəsini tərk etsə yaxşı olar. Beyləqan bazarı ona qucaq açmağa hazırdır.


Xəbər lenti