Türkiyənin İzmir vilayətinin Aliağa rayonunda yerləşən HABAŞ Dəmir-Polad Zavodunda baş verən partlayış nəticəsində ölənlərin sayı 3-ə çatıb.
Bu barədə İzmir Valiliyi məlumat yayıb.
Bildirilib ki, partlayış nəticəsində yaranan dağıntılar altında 10 nəfərin qaldığı ehtimal olunur.
Qeyd edək ki, hadisə yerinə çoxsaylı yanğınsöndürmə briqadaları, təcili tibbi yardım qrupları və polis əməkdaşları cəlb edilib.
Türkiyənin səhiyyə naziri Kemal Memişoğlu daha əvvəl hadisə nəticəsində 1 nəfərin öldüyünü, 15 nəfərin yaralandığını açıqlamışdı. Yaralılardan 3-nün vəziyyətinin ağır olduğu bildirilirdi.
