Nigeriyanın şimalındakı Zamfara əyalətində difteriya epidemiyası nəticəsində 44 nəfər həyatını itirib.

7News.Az xarici mətbuata istinadən xəbər verir ki, Zamfara Əyaləti Səhiyyə Nazirliyinin İctimai Səhiyyə direktoru Yusuf Haske açıqlamasında bu il əyalətdə 367 şübhəli difteriya halının qeydə alındığını bildirib.

Onun sözlərinə görə, xəstələrdən götürülən nümunələr üzərində aparılan laboratoriya analizləri nəticəsində difteriyaya səbəb olan bakteriya təsdiqlənib.

Haske 323 xəstənin müalicəsi başa çatdıqdan sonra evə buraxıldığını qeyd edib.

Epidemiya nəticəsində 44 nəfərin öldüyünü bildirən səhiyyə rəsmisi xəstəliyin yayılmasında icma daxilində aktiv yoluxmanın təsirli olduğunu deyib.

Haske ən çox 6-10 yaş qrupunda olan uşaqların difteriyadan təsirləndiyini vurğulayıb.

Xəstəliyin yayılmasının qarşısını almaq məqsədilə məktəblərin açılışının 2 həftə təxirə salındığı bildirilib.