Gələn ildən başlayaraq çay plantasiyalarına əkin subsidiyası veriləcək. Plantasiyaların hər hektarına görə fermerə hər il 700 manat subsidiya ödənilməsi nəzərdə tutulur. Fermer bu məbləğdə subsidiyanı plantasiyanın salındığı ilk 7 il ərzində alacaq.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Vüqar Hüseynov AZƏRTAC-a bildirib ki, çay bitkisinin məhsula düşməyə başladığı 8-ci ildən etibarən isə subsidiya 1,2 əmsalla, yəni hər hektara 240 manat olmaqla veriləcək. Aqrar Subsidiya Şurasının bu qərarı 2019-cu ildən salınmış çay plantasiyalarına şamil edilir.

"Çay bitkisi üçün 7 illik yüksək əmsallı (3,5) dəstək subsidiyasının müəyyənləşməsi dövlətin çayçılığın inkişafında maraqlı olması ilə bağlıdır. Bu sahəyə dövlət dəstəyinin genişləndirilməsi ixrac potensialı yüksək olan bitkiçilik məhsullarının istehsalını artırmış olacaq”, - deyə o əlavə edib.

 7News.Az