İnstaqram istifadəçi təcrübəsini yaxşılaşdırmaq məqsədilə şərhlərlə bağlı yeni funksiyanı test etməyə başlayıb.

 

7News.Az xarici mətbuata istinadən xəbər verir ki, yeniliyə əsasən, istifadəçilər artıq mənfi, yersiz və ya təhqiramiz hesab etdikləri şərhlərə xüsusi "mənfi səsvermə” düyməsi vasitəsilə reaksiya verə biləcəklər.

Bildirilib ki, şirkətin məqsədi platformadakı müzakirə mühitini daha sağlam və təhlükəsiz hala gətirməkdir. Yeni sistem sayəsində istifadəçilər narahatlıq yaradan və mövzuya aid olmayan rəyləri işarələyə biləcək. Bunun nəticəsində həmin şərhlərin görünürlüğünün azaldılması nəzərdə tutulur.

Ən diqqətçəkən məqamlardan biri isə odur ki, bu funksiya ictimai "bəyənməmə sayı” göstərməyəcək. Yəni istifadəçilər şərhlərinin neçə nəfər tərəfindən mənfi qiymətləndirildiyini görə bilməyəcəklər. Platforma hesab edir ki, bu yanaşma həm istifadəçilərin təzyiq hiss etməsinin qarşısını alacaq, həm də kütləvi neqativ reaksiyaların yaratdığı psixoloji təsiri minimuma endirəcək.

Məlumata görə, funksiyanın hazırda məhdud sayda istifadəçi arasında test edildiyi bildirilir. Test nəticələri uğurlu olarsa, yaxın aylarda yeniliyin daha geniş auditoriya üçün əlçatan olması gözlənilir.

Ekspertlər hesab edirlər ki, bu addım sosial şəbəkələrdə nifrət nitqi, təhqir və aqressiv davranışların azalmasına müsbət təsir göstərə bilər. Bununla yanaşı, bəzi istifadəçilər isə funksiyanın fikir azadlığına təsir edə biləcəyi ilə bağlı narahatlıqlarını ifadə edirlər.